Жоба жаңалықтары
Ағымдағы жылдың сәуір айында басталған Х.Досмұхамедов атындағы Атырау университетінде студенттерді кәсіпкерлікке баулу және жаңа бизнес-идеялар табуға арналған «Алты кілт – Алтын кілт» инновациялық идеялар турнирі жобасы өз мәресіне жетті.
Жоба мақсаты – Атырау облысы кәсіпкерлерімен байланыс орнату; жаңа бизнес-идеяларды іздеуді студенттерге үйрету және идеяларды генерациялау; университет қабырғасында жүріп жаңа кәсіп ашу үшін студенттерге біліктілік дағдыларын үйрету, тапсырмалар арқылы студенттерге кәсіпкерлікпен айналысып көруге жағдай жасау; жаңа бизнес-идеяны қаржыландыру және университет тарапынан қаржылай, психологиялық және біліммен қолдау көрсету. Жоба барысында 6 апта бойы мамандардың инновация, бизнес, көшбасшылық, маркетинг, топта жұмыс жасау, келіссөздер жүргізу тақырыптарындағы семинар-тренингке қатысып, біліктілік дағдыларын үйренген қатысушыларымыз жүлде иегерлері атанып, сертификаттармен марапатталып, сәтті аяқтап шықты.
Жобаның жабылу салтанаты 8 маусым күні болып өтті. Алғаш боп сөз сөйлеген университет ректоры, химия ғылымдарының докторы, профессор Абзал Ахатұлы: «Барлық қатысушыларды жобаны сәтті аяқталуымен құттықтаймын! Қыздар мен жігіттердің жобалары сәтті дайындалып, жақсы көрініс тауып жатса, біз, университет атынан қолдауға әрқашан дайынбыз. Сондықтан бүгінгі күні, міне арнайы қаражат бөліп отырмыз. Қатысушыларға тек сәттілік тілеп, алға баса беріңдер деймін,» - деп өз сөзінде арнайы дайындалған ұтыстарды атап өткен болатын.
Әрі қарай сөз кезегін жалғаған университеттің бірінші проректор - стратегиялық жоспарлау және халықаралық байланыстар жөніндегі проректоры, жоба идеясының авторы Шилібекова Айгерім Сенбекқызы өз сөзінде бұл жобаның университетіміздің жаңа өнімі екенін атап өтті. Аталмыш жоба 36 студент-қатысушымен, оқудан тыс уақытта, яғни сенбі күні өтетін болып, өз жұмысын бастаған болатын. Бүгінгі күні 5 топ құрылып, жабылу салтанатында өз жобаларын таныстырып, қорғап шықты. Атап айтқанда 3-орынды иеленген - «Жас кәсіпкер» командасы 200 000 теңгелік, ал 2-орынды – «Stars»командасы 300 000 теңгелік ұтыс сертификатымен марапатталды. Ал 1-орынға дайындалған 500 000 теңге көлеміндегі ұтыстың иегері - «APL» командасы болды. Сондай-ақ қатысушылар әр апта сайын орындалған тапсырма үшін құны 5000 теңгелік болып табысталған кілттердің сертификаттарын алды.
Жоба аясындағы «Ең үздік блогер» номинациясы бойынша 3-орынды – Марина Аманжолова, 2-орынды – Орынай Сәкенова, ал 1-орынды – Алтынай Сәлімгерейқызы иеленді. Сондай-ақ «Ең үздік фото-блогер» номинациясының 2-орынымен Райымбек Қадырғалиев, ал 1-орынымен Айдос Каримов марапатталды.
Жобаның салтанатты жабылу шарасы Қуаныш Қашқылдықов пен Жолдас Үсенғалиевтың орындауындағы жобаның әнұраны болған әнмен аяқталды.
ПІКІРЛЕР