Қазақстан Республикасы Ғылым және жоғары білім вице-министрі Қуаныш Асылханұлы Х.Досмұхамедов атындағы Атырау университеті Ғылыми кітапханасында болып, ондағы сирек кездесетін ескі әдеби кітап қорымен, ректор кітапханасымен, "Бір ел - бір кітап", Ахмет Байтұрсынұлының 150 жылдығына арналған кітап көрмелерімен танысты. Жаңа оқу жылы басталысымен кітапханаға жиналған жас оқырмандар күтпеген кездесуге қуанысып қалды. Олармен әңгімелесу барысында кітап қоры, оқылған әдебиеттерден бөлек, жоғары оқу орны мен жастарға қатысты көптеген мәселелер ортаға салынып, талқыға түсті. Сондай ұсыныс-пікірлердің бірі студенттік дебаттарға қатысты айтылды. Жас ұрпақтың белсенділігін арттырып, сөйлеу мәдениетін қалыптастыруға бірден-бір ықпал ететін пікірсайыстардың республикалық деңгейде көрінуіне қолдау білдіруді сұраған жастар ол үшін креативті жобалар жасап ұсынуға да дайын екендіктерін жеткізді. Сондай-ақ, студенттер Х.Досмұхамедов атындағы университет тарапынан өздерін жататын орынмен, тамақтану орындарымен, бос уақыттарын тиімді пайдалану үшін тиесілі жағдайлар жасалып отырғанына ризашылық білдірді. Атап айтсақ, оқу орнының жатақханалары еліміз бойынша ең арзан жатақханалардың қатарынан саналады, былтыр студенттер ол үшін айына 3000 теңге, биыл 7000 теңге төлеп отыр. Сонымен қатар, қонақтар университетіміздің «Жайық» мәдени-спорт кешенінін аралап, спортшы студенттеріміздің жетістіктерімен танысты.

Тізімге қайта оралу