Олимпиада жеңімпаздары марапатталды
2 наурызда Х. Досмұхамедов атындағы Атырау университетінде жалпы білім беретін пәндер бойынша республикалық олимпиаданың облыстық кезеңінің жабылу салтанаты өтті.
Шараға облыстық білім беру басқармасының басшысы Есенғалиев Сатқан Ыбырайұлы, Х.Досмұхамедов атындағы Атырау университетінің ректоры Идрисов Саламат Нұрмұханұлы және аудандық білім бөлімінің басшылары мен олимпиада жеңімпаздары қатысты.
Салтанатты жиында сөз алған облыстық білім беру басқармасының басшысы Сатқан Ыбырайұлы пәндік олимпиаданың дарынды жеткіншектерді тәрбиелеуге ықпалы зор екенін, келешегіне жол ашатын үлкен мүмкіндік екенін атап өтіп: «Құрметті ұстаздар, еліміздің дарынды балаларын анықтауда олардың білімге деген құштарлығын дамытуда қолдау көрсетуде Үкіметіміздің, облыс басшылығының тарапынан жасалып жатқан барлық мүмкіндіктерді пайдалана отырып, білім сапасын арттыруға, жетістіктерімізді молайтуға күш-жігерімізді салуға шақырамын» - деп сөзін аяқтады.
Жиын барысында облыстық олимпиаданың жеңімпаздарына арнайы сертификаттар мен естелік сыйлықтар табысталды.
Жабылу салтанатында сөз алған Х. Досмұхамедов атындағы Атырау университетінің ректоры Идрисов Саламат Нұрмұханұлы олимпиада қатысушыларына сәттілік тілеп, университет атынан жеңімпаздарға білім гранттарын табыс етті.
Сондай-ақ, облыстық олимпиада жеңімпаздарына еліміздегі ең беделді ЖОО бірі - Қазақстан-Британ техникалық университетінің гранттары берілді.
Шара соңында жиынға қатысушылар оқушыларға тілектерін білдіріп, естелік суретке түсті.
Айта кетейік, пандемияға байланысты 5 күнге жалғасқан жалпы білім беретін пәндер бойынша республикалық олимпиаданың облыстық кезеңіне 419 оқушы қатысты. Олимпиадаға қатысушы қала оқушылары Х. Досмұхамедов атындағы Атырау университетінің базасында, ал аудан оқушылары жергілікті тест орталықтарында отырып, тапсырмаларын орындады. Олимпиада өткізілген кабинеттерге бейнекамералар қойылып, тікелей эфир сілтеме арқылы қатысушылардың ата-аналарына, мектеп ұжымына қолжетімді болды.
Оқушылардың жауаптары алдын-ала шифр қойылып, darynatyrau.kz сайтында жарияланып отырды.
ПІКІРЛЕР