Білім сапасының деңгейін арттыру - басты талап
26 қарашада Х.Досмұхамедов атындағы Атырау университетінде "Білім беру сапасын қамтамасыз етудің өзекті мәселелері" тақырыбында онлайн семинар өтті.
Онлайн кездесу барысында Атырау облысы білім беру басқармасының басшысы Есенғалиев Сатқан Ыбырайұлы "Орта білім беру жүйесіндегі білім сапасын қамтамасыз ету" тақырыбында білім беру саласындағы өзекті мәселелерге тоқталды. ҚР БЖҒМ Атырау облысы Білім сапасын қамтамасыз ету департаментінің басшысы Атыбаев Болат Қожанұлы "Білім саласын қамтамасыз етудің тетіктері" тақырыбында тың ұсыныстар мен пайымды пікірін ортаға салды. Сонымен қатар, өз баяндамасында: " Сапалы білім беру үшін қауіпсіз білім ордасын құру керек. Сол үшін біз білім ордаларының қауіпсіздігін қадағалап шықтық. Атап айтар болсақ, мектептер мен колледждер мен ЖОО-ында бейне бақылау құралдары толықтай қондырылған. Бұл үлкен жетістік. Сонымен қатар, қадағалау барысында мектеп мұғалімдеріне қолайлы жағдайлар жасалғанын байқадым. Мұғалімдер ұлттық біліктілікті арттыру тесттерінен өткен. Білім берудің сапасының бірден-бір кілті - балалардың сабаққа толықтай қатысуы, әдістемелік кабинеттердің ашылып, толыққанды жағдаймен қамтамасыз етілуі, сондай-ақ, талаптарға сай пікір алмасып жұмыс жасау керек" - деп ерекше атап өтті.
Басқарма Төрағасы-ректор м.а. Идрисов Саламат Нұрмұханұлы "Білім сапасын көтерудегі өңірлік ЖОО-ның рөлі" тақырыбындағы баяндамасы барысында «Тек мұғалім мамандығы сұранысқа ие болып, жоғары материалдық және рухани мәртебеге ие болған жағдайда ғана біздің білім берудегі оң өзгерістерді күтуге болады»,- деп сөзін аяқтады.
Кездесу барысында Атырау облысы Білім беру басқармасы атынан басшысы С.И.Есенгалиев, Х.Досмұхамедов атындағы Атырау университеті атынан Басқарма Төрағасы – Ректор м.а. С.Н.Идрисов, қалалық және барлық аудандық білім беру бөлімінің меңгерушілері Атырау облысында педагог кадрларды дайындау және тұрақтандыру, оларды әлеуметтік қорғауға маңызды мән бере отырып, «Атырау облысында педагог кадрларды дайындау және үздіксіз білім беруді ұйымдастыру» туралы меморандумға қол қойды.
Бұл - меморандум облыстың білім беру ұйымдарындағы педагог кадрлармен қамту, кадрлардың жетіспеушілігін шешу, кадрларды дайындау, үздіксіз білім беруді ұйымдастырудың тиімді тетіктерін енгізу және жергілікті жерлердегі әлеуметтік көмек мәселелері мен демеушілік көмек көрсетуді қамтамасыз ететін негізгі бағыттарды белгілейтін және қажетті іс-қимылдарды анықтайтын құжат.
Онлайн кездесудің екінші бөлімінде Zoom платформасы арқылы қатысып отырған қатысушылар білім саласына қатысты сұрақтарын қойып, жауаптарын алды.
Сонымен қатар, кездесу барысында блім сапасын көтеру мақсатында ұсыныстар айтылып, өзекті мәселелер талқыланды.
ПІКІРЛЕР