- Басты бет
- МЕДИА-РЕСУРСТАР
- Жаңалықтар
- Атырау өңірінің ардақты азаматын мерейлі жасымен құттықтаймыз!
Атырау өңірінің ардақты азаматын мерейлі жасымен құттықтаймыз!
Атырау облысының жайсан да, ақиық азаматтарының бірі, ел ағасы, мемлекет және қоғам қайраткері, еліміздің тәуелсіздік жылдарынан бастап экономикамыздың қалыптасуы мен осы Атырау облысының дамуына, оның көркеюіне мол үлес қосқан, Атыраудың белгілі мұнайшылар династиясының көрнекті өкілі, Равиль Тәжіғараұлы Шырдабаев мырза бұл күнде асқаралы мерейлі 80 жасқа толып отыр.
Равиль Тәжіғараұлы Шырдабаев 1940 жылдың 26 мамырында Атырау облысында дүниеге келген. Экономика ғылымдарының докторы. Мәскеудің Губкин атындағы мұнай және газ институтын (1961), КОКП ОК жанындағы жоғары партия мектебін (1975) бітірген. Атырау, Жаңаөзен қалалық партия комитеттерінің І хатшысы, Махамбет аудандық партия комитетінің І хатшысы (1975–1993), «Теңізшевройл» қазақ-америка біріккен кәсіпорнының директоры, Қазақстан мұнай және газ өнеркәсібі министрі (1993–1994), Атырау облысының әкімі (1994–1998) болды. 1999 жылдан дипломатиялық жұмыстар атқарды. 2004-2007 жылдар аралығы мәжіліс парламент депутаты, 2007 жылдан бастап «Нұр Отан» ХДП-ның жанындағы сыбайлас жемқорлыққа қарсы күрес Республикалық қоғамдық кеңес төрағасының орынбасары болды. 100-ге тарта ғылыми мақалалар мен бірнеше кітаптың авторы. Равиль ағамыздың ел алдындағы ерен еңбектері де елеусіз қалған жоқ. Ол «Еңбек Қызыл Ту» ордені, Тәуелсіз Қазақстанның "Парасат" "Құрмет Белгісі", "Барыс" ордені және басқа да көптеген марапаттардың иесі.
Әрине бүгінгі таңда Равиль Тәжіғараұлы ағамыз туралы БАҚ беттерінде ол кісінің еңбектері, жүріп өткен өмір өткелдері туралы көптеп жазылуда. Ол кісінің Атырау облысының әкімі болып тұрған кездегі және басқа да уақыттарда атқарған қызмет барысындағы барлық халық игілігі үшін жасалған игі істерін жіпке тізіп жазу мүмкін емес шығар, бірақ жастар үшін сонын ішінде спорт сүйер қауым үшін жасап кеткен кейбір нысандарына ғана тоқталып өткім келеді.
Ол, әрине, ең алдымен ағамыздың осы Атыраудағы білім ордасы, қарашаңырақ Халел Досмұхамедов атындағы Атырау мемлекеттік университетіне өзінің тікелей басшылығымен 1984 жылы Гурьев партия комитетінің бірінші хатшысы қызметін атқарып тұрған жылдары Равиль Тәжіғараұлы (сол кездегі) Гурьев педагогикалық институтының жанынан «Буревестник» спорт кешенінің салынуына тікелей басшылық жасаған болатын. Бұл осы институттың профессор – оқытушылары үшін де, студенттері үшінде, жалпы қаладағы спорт сүйер қауым үшін де кезіндегі баға
жетпес сый болды. Міне, сол жылдардан бері осы спорттық кешен халық игілігі үшін жұмыс жасап келеді. Бұл спорттық кешенде футбол алаңымен қатар оның ішінде ұзындығы 25 метрге, тереңдігі 2 метр болатын бассейн, тринажор залы, заманауи қатардағы гимнастикалық және «Дене шынықтыру және спорт» мамандығының студенттері үшін қажетті басқа да спорттық залдар қосылып салынған болатын. Спортшы студенттермен қатар, жоғарғы оқу орнының профессор – оқытушылары, Атырау облысының көптеген тұрғындары өздерінің бос уақыттарында осы спорттық кешенге келіп спортпен шұғылдануға толық мүмкіндігі болатын. Демек, Атырау облысы халқының салауатты өмірін қалыптастырудағы бұл «Буревестник» спорт кешенінің алатын орны ерекше екенін атап өткім келеді.
Ал, осы Халел Досмұхамедов атындағы Атырау мемлекеттік университетін спортшы мамандығы бойынша бітірген, аттары әлемге танылған түлектерімізде өздерінің үлкен спортқа деген алғашқы қадамдарын осы «Буревестник» кешенінен бастады десем қателеспеген болармын. Атап айтар болсақ олар: Арман Шылманов, Ринат Ибрагимов, Болат Теміров және басқа да көптеген спорт саңлақтарының алғашқы қадамдары осы жерден басталған болатын.
Ал, тәуелсіз Қазақстан уақытында яғни Равиль Шырдабаевтың Атырау облысының әкімі болып тұрған кезінде өздеріңіз білетін ол мынау Жайық өзенінің сол жақ жағалауында орналасқан «Орталық сауықтыру спорт кешенінің» салынуы болды. Ол Атырау қаласындағы елеулі уақиғалардың бірі болды. Бұл сауықтыру спорт кешені әр адамға қай спорттың түрімен айналысам десе де есігін айқара ашқан үлкен спорт сарайы болды. Демек, Равиль ағамыз қай заман да болсын, қай жерде қандай қызмет атқарса да алдымен жастарды, олардың спортпен шұғылдануына, олардың салауатты өмір салтын қалыптастыруына ерекше үлкен үлес қосқан азаматтардың бірі. Қазіргі кезде бұл спорт кешені Жайық өзенінің жағалауындағы Атыраудағы көрікті орындардың бірі болып саналады. Мұнда мыңдаған жас спортшыларымыз спорттың көптеген түрлерімен айналысып және спорттың көптеген түрлерінен Қазақстанның біріншілік жарыстары да осы біздің Атыраудың «Орталық сауықтыру спорт кешенінде» - ұйымдастырылатынын айтқым келеді.
«Спорт – денсаулық кепілі» - деген. Сондықтанда мұндай спорттық кешендерді қаламызда қаншама салсада артық
болмайтыны белгілі. Себебі ол болашақ ұрпақ үшін елеулі рөл атқаратын нысандар болып табылатыны анық.
Өздеріңіз білесіз Атырау өңірі өзінің қара мұнаймен немесе қара уылдырығымен ғана бай емес, ол мынау тарихтан белгілі өздерінің ер жүрек батырларымен де, өнер қырандарымен де, небір ақын жазушыларымен де, немесе жаны жайсан жақсы азаматтармен де бай. Сондай жақсы – жайсан азаматтарымыздың бірі, біздің жерлесіміз Шырдабаев Равиль Тәжіғараұлы ағамыз.
Равиль Тәжіғараұлы!
Халел Досмұхамедов атындағы Атырау мемлекеттік университетінің профессор –оқытушылар құрамы мен мыңдаған студенттері сізді Атырау халқы үшін, сонын ішінде біздің университетіміз үшін жасаған игі істеріңізге үлкен рахмет айта отырып, бұл спорттық кешендердің болашақ жас өскелең ұрпақтың игілігі үшін жұмыс жасай беретініне кәміл сенеді.
Сондықтан да біз: «Жүйрік уақыттың ұшқыр қанаты сізді бүгінгі күні 80 жасқа әкелседе, жасағаныңыздан жасайтыныңыз көп ұзақ өмір тілейміз сізге, осынау артта қалған шұғылалы ғұмырыңыз өзіңіздің ізіңізді басқан інілеріңіз бен жастарға әрқашанда өнегелі жол болады» - деп санаймыз. Сізді бүгінгі асқаралы мерейлі 80 жасыңызбен құттықтап, деніңізге саулық, отбасыңығға амандық тілейміз.
Х.Досмұхамедов атындағы Атырау мемлекеттік университеті,
"Әлеуметтік - гуманитарлық пәндер" - кафедрасының меңгерушісі,
доцент, философия ғылымдарының кандидаты
С.Б.Аймұратов.
ПІКІРЛЕР