АЛҒЫС АЙТУ КҮНІ ҚАРСАҢЫНДА КОНКУРС ЖАРИЯЛАНАДЫ
Көктемнің алғашқы күнімен тұспа-тұс келетін 1 наурыз елімізде жалпыхалықтық мереке - Алғыс айту күні.
Қазақстан Республикасы Президентінің Жарлықтарымен Қазақстан халқы Ассамблеясы құрылған күн – 1 наурызды жыл сайын барлық этностардың бір біріне және мейірбандық танытып, ол адамдарды өз туғанындай қабылдаған қазақтарға Алғыс айту күні ретінде атап өту елімізде дәстүрге айналды.
Осы күн тағдыр тоғыстырған Қазақстанның көпэтносты халқының ортақ тарихын құрметтеу күні болады. Бұл – тағдыр тәлкегімен Қазақстан жеріне еріксіз қоныс аударған түрлі этностардың миллиондаған өкілдерінің құтты қонысына айналған қасиетті қазақ жері мен қонақжай қазақ халқына терең тағзымның белгісі. Біздің халық бас сауғалап келген ұлт өкілдерін Хәкім Абай: «Адамзаттың бәрін сүй бауырым деп…» дегендей бөліп-жармай, қолындағы барымен бөлісті. ХХ ғасырда Қазақстан аумағында ГУЛАГ - АЛЖИР, Степлаг, Карлаг құрылымының ең ірі лагерлері болды. Қуғын-сүргін жылдары Қазақстан лагеріне 5 млн-нан астам адам жіберілді. 1921-1954 жылдар аралығында Қазақстанда 100 мың адам сотталған, олардың ішінде 25 мың адамға ең жоғарғы жазалау шарасы - ату жазасы қолданылды. 1930-1940 жылдары Қазақстанға тұтас халықтардың жаппай депортациясы келді. 1937 жылдың күзінде жүздеген мың корейлер, түріктер, ирандықтар, күрділер мен әзірбайжандар республикаға қоныс аударды. Сондай-ақ, Ұлы Отан соғысы жылдарында елге немістер, гректер, шешендер, ингуштер, қарашайлар, балкарлар, Қырым татарлары және басқа халықтар да жер аударылды. Бұл – репрессия мен жер аудару жылдарында біздің халық көрсеткен мейрімділік пен ақ көңілдік, қолда бармен бөлісу, көмек көрсету сынды рухани дәстүрлер күні.
Бұл дәстүр әлем елдерінде бар. АҚШ және Канада халықтары Алғыс айту (Thanksgiving Day) күнін қараша айының әрбір төртінші бейсенбісінде атап өтетін көрінеді. Атаулы күн алғаш рет 1621 жылы ағылшындық колонистердің бастамасымен тойланған. Қыс мезгілі өте ауыр болып, адамдар аштыққа ұшырағандықтан губернатор Уильям Брэдфорд қол астындағылардың көңіл-күйін көтеру үшін Алғыс айту күнін белгілейді. Айналадағы басқа да көршілер бұл дәстүрді жылы қабылдап, қаһарлы қысты аман-есен өткереді. 1789 жылы Джордж Вашингтон Рақмет айту күнін ұлттық мереке деп жариялаған. Бұл күні барлық отбасы міндетті түрде дастарқан басына жиналып, туыстарына жақсылық жасауға асығады.
Алғыс айту күнін мерекелеудің жаңа дәстүрі елдің бірлігін ортақ тарих және тарихи сана негізінде нығайту мен дамытудың мән-мәтінінде қазақстандық құндылықтарды бейнелейді.
Алғыс айту күні – қазақ халқының дархандығы мен даналығын көрсететін айтулы күн. Бүгін бұл мерекенің кең ауқамды мән-мағынасы бар. Қазақстандықтар осы күні бір-біріне, әкеге, ағаға, әпкеге, ініге, ұстазға, сүйгенге, Елге, Өмірге өз ризашылығын білдереді, құрмет көрсетеді.
Жаңа көктеммен, жаңару, Алғыс айту күнімен!
Алғыс айту күні қарсаңында Атырау облысы әкімі аппаратының "Қоғамдық келісім" коммуналдық мемлекеттік мекемесі және Атырау облысы Қазақстан халқы Ассамблеясының Ғылыми-сараптамалық тобы жоғары оқу орындарының студенттері мен магистранттары, Атырау қаласының арнаулы орта оқу орындарының оқушылары арасында 2020 жылдың 2 наурызынан 20 мамырына дейін "ӨТКЕНДІ ЕСТЕ САҚТАЙМЫЗ" тақырыбындағы эссе байқауын жариялайды. Конкурстың ережесі біздің университет сайтының жарияланымдар рубрикасында қойылған. Студенттер мен магистранттарды конкурсқа қатысуға шақырамыз және сәттілік тілейміз!
Ұрпақтар сабақтастығын жалғастыру үшін, қоғамдық және тарихи сананы жаңғырту «Архив-2020», «Ұлы Дала тұлғалары» бағдарламалар аясында Қазақстан халқы Ассамблеясы Институты бір қатар жобалар мен зерттеулерді іске асыруда, соның қатарында Қазақстан этностарының тарихы, ХХ ғасырдағы Қазақстандағы бейресми жастар ұйымдарының тарихы және мемлекеттік қайраткерлер туралы жаңа басылымдарды дайындауда.
Жанна Қыдыралина,
Қазақстан халқы Ассамблеясы
Ғылыми-зерттеу институтының директоры,
тарих ғылымдарының докторы, профессор
ПІКІРЛЕР