Ермахан Ибраимов университетімізде қонақта
Х.Досмұхамедов атындағы Атырау мемлекеттік университетінде бокстан Сидней олимпиадасының чемпионы, халықаралық дәрежедегі спорт шебері Ермахан Ибраимовпен кездесу өтті.
Бүгін университетімізде Жастар саясаты департаменті мен Атырау өлкесі тарихы, археологиясы және этнографиясы ғылыми зерттеу орталығының ұйымдастыруымен университет жанынан құралған «Саяси ринг» пікірталас алаңының алғашқы отырысы өтті.
Осыған орай, «Саяси ринг» пікірталас алаңына - Қазақстанның сан мәрте чемпионы, Азия чемпионы, Әлем чемпионатының күміс жүлдегері, Азия ойындарының чемпионы, Әлем чемпионатының қола жүлдегері, ҚР бокстан Еңбек сіңірген спорт шебері , ҚР бокстан Еңбeк сіңірген жаттықтырушысы Ибрайымов Ермахан Сағиұлы келді.
Жиынға университет ректоры С.Н.Идрисов, «Қазақстан-Атырау» телеарнасының директоры Қанат Әуесбай, профессор-оқытушылар құрамы мен студенттер қатысты.
- Қазақстан тәуелсіздігін алғаннан бері туған елдің жалауын жат жерде желбіретін жүрген азаматтар жоқ емес. Әсіресе, спорт саласындағы былғары қолғап иелерінің еңбегі ерекше. Бүгінгі университетіміздің қонағы Ермахан Сағиұлы да тек спорт саңлағы ғана емес, сонымен қатар, қоғам қайраткері, оның талай чемпиондарды дайындауда аянбай тер төгіп жүргені де үлгі боларлықтай іс,- деп Саламат Нұрмұханұлы келген қонаққа сөз кезегін берді.
Бір сағатқа созылған сұхбат барысында студенттер тарапынан түрлі сұрақтар қойылып, тұшымды жауаптар алынды.
— Спортқа ең алғаш 10 жасымда аяқ бастым. Сол кездері Жақсылық Үшкемпіров пен Серік Қонақбаевты үлгі тұттым. Ең үлкен жетістігім, ол – Сидней олимпиадасындағы жүлде. — деп әңгімесін бастады боксшы. Ол Кеңес дәуірі тұсындағы бокс пен бүгінгі тәуелсіз Қазақстанның боксын салыстырып, елімізде жастардың спортпен айналысуына барлық жағдай жасалғанын жеткізді.
Қазіргі таңда, Атырау өңірінде де мықты спортшылар өсіп келе жатқанын тілге тиек етіп, Х.Досмұхамедов атындағы Атырау мемлекеттік университетінің І курс студенті Сағынғали Аманаттың болашағынан зор үміт күтетінін баса айтты.
Сондай-ақ, Ермахан ағамыз Қазақ боксының керемет жұлдызы болған Бекзат Саттарханов туралы тебірене сөз қозғап, жастарға үлгі боларлық тұстарын атап өтті.
- Бекзат Саттарханов – тек қана Қазақстан боксының емес, әлемдiк бокстың эталонын көрсеткен боксшы. Керемет техникасы, керемет еңбекқорлығы, керемет намысты жiгiт едi ғой. Әттең, жұлдыздай жарқ еттi де, ортамыздан кете барды. 20 жасында биік белесті бағындырып, Қазақстанның емес, бірден Олимпиада чемпионы атанған Бекзаттың бойындағы намыс пен қайрат әрбір қазақ жастарының бойында болуы тиіс деп ойлаймын,- деді.
Кездесу соңында жиналған студенттер бүгінгінің батырымен естелік суретке түсіп, кездесуден ерекше әсермен тарқасты.
ПІКІРЛЕР