Іскер әйелдер жастармен кездесті
Бүгін университетімізде Атырау облысының сот, құқық қорғау органдарының, мемлекеттік және жергілікті атқарушы органдарындағы басшы лауазымындағы әйелдердің жастармен кездесу сұхбаты өтті.
Кездесуге депутат әйелдер, облыстық комиссия мүшелері, қала, сот органдарында, мемлекеттік, корпоративтік секторларда жұмыс жасайтын белсенді әйелдер және жастар қатысты.
Кездесудің мақсаты - Қазақстан Республикасының 2030 жылға дейінгі отбасылық және гендерлік саясатын жүзеге асыру тұжырымдамасы негізінде биліктің атқарушы, өкілді және сот органдарында, мемлекеттік және корпоративтік секторларда шешімдер қабылдау деңгейіндегі әйелдердің үлесін 2020 жылға қарай 27 ге көтеру болып табылады.
Жиынды Атырау облыстық мәслихатының депутаты, Атырау бизнес және құқық колледжінің директоры, «Атырау облысының іскер әйелдер қауымдастығы» қоғамдық бірлестігінің жетекшісі Әйтиева Нұрлы Тельманқызы жүргізді.
Алдымен Атырау облысының кәмелетке толмағандардың істері жөніндегі мамандандырылған ауданаралық сотының төрағасы Ташенова Айгүл Қуанышқызы өзінің еңбек жолын қалай бастап, қарапайым маманнан басшы лауазымына дейін жүріп өткен жолы туралы баяндап, қатысушылардың сұрақтарына жауап берді.
- Еліміздің жаңа саяси мәдениетін әйел адамның қатысынсыз қарастыру мүмкін емес,- деп қоғамда басшы лауазымындағы әйелдердің өңірдің әлеуметтік дамуына ерекше үлес қосып жүргендігі туралы Атырау облысы статистика департаментінің басшысының орынбасары Айнаш Есжанова баяндады.
Жиын соңында Облыс әкімі жанынан құрылған әйелдер істері және отбасылық - демографиялық саясат жөніндегі бас инспектор Замзагүл Жалмурзина әйелдердің бүгінгі қоғамда саяси ілгерлеуі туралы кеңіне тоқталды.
2019 жыл Жастар жылы деп жарияланған болатын. Жастар қоғамның қозғаушы күші, ең белсенді бөлігі, яғни жарқын болашақ кепілі, ал болашақ бүгіннен басталады. Еліміздің ертеңгі болашағы, бүгінгі Атырау облысының сот, құқық қорғау органдарының басшы лауазымындағы әйелдердің жастармен кездесу сұхбатынан ой түзіп, өзінің өмірлік бағытын таңдай білсе, келешегіміз кемел боларына сенім мол.
ПІКІРЛЕР