03.10.2019 1306

 «Адам өз өмірінің қожасы, сондықтан да өз бағытын өзі жасауы керек. Ол не нәрсеге де ұқыптылықпен қарап, жиған - тергенін орынсыз шашпай, кез-  келген адамға ашпай, өзінің мақсат мүдделері жөнінде достарымен ғана бөлісіп отыруы керек. Осылайша өмір сүрген адамның ғана ар-ожданы таза болады» - деген Әл-Фараби.  Шынымен де адам  - ең әуелі адамгершілігімен және өзінің парасатының биіктігімен көрікті.
Бүгінгі мақаламыздың негізгі кейіпкері де  өзіміздің  мақтанышымыз, жерлесіміз, қоғам қайраткері, «Қазақстанның Құрметті азаматы», 2019 жылдың «Жыл тұлғасы»,  бұл күнде Атырау облысы жауынгерлік өнер ассоциациясының президенті Табылдиев Ерлан Хисметұлы.  
Ерлан Хисметұлы 1970 жылдың қоңыр күзінде Табылдиевтер отбасында дүниеге келді. Ол жастайынан өзінің әке - шешесімен қатар атасы мен әжесінің  де жылылығын, тәрбиесін, қамқорлығын көріп өскен жігіт. Соның арқасы боуы керек, оның бойында нағыз қазақтың бойына бітер мінез-құлық пен адамгершілік, парасаттылық пен табандылық сияқты  қылықтардың бәрі осы бір адамның бойында жинақталғандай. 
«Тектіден текті туады, тектілік негіз қуады» - деген сөз бар қазақта.
Ерланның әкесі марқұм Хисмет Бозанұлы жастайынан білімге, ғылымға, спортқа құштар болған азамат. Ол кісі ғылымда да,  спортта да өз өмірінде көптеген жетістіктерге жеткен. Сол еңбекқорлылығының арқасында Атырау өңіріндегі бірден-бір жоғарғы оқу орны - университетті басқарып, ректор қызметін атқарып тұрған жылдары жастарды біліммен қоса спортқа да барынша тартып, студенттер арасында салауатты өмір салтын қалыптастыра білген азамат. 
Бірақ, осы бір Табылдиевтар әулетіндегі ерлердің көпшіл, қайырымды, адамгершіліктері мол болып қалыптасуына, әрине отбасының алтын діңгегі Майра анамыздың алатын орны ерекше. Ол кісі отбасындағы татулықтың тірегі әрі  «тылдың ардагері» секілді Ерлан ұлының өсіп-өнуіне, оның білім алуына, азамат болып қалыптасуына айрықша үлес қосқан жан.
Мектеп  кезіндегі Ерланды айтатын болсақ, ол әрине қазіргі тілмен айтқанда мектеп оқушыларының арасында нағыз лидер болатын. Ол негізінен спортқа өте жақын болды, әсіресе бокс, каратэ сияқты спорттың түрлерімен көп айналысты. Футбол ойнағанды жаны сүйетін. Облысымыздың мектепаралық біріншіліктерінде өзі оқыған қаламыздағы №15 Абай Құнанбаев атындағы мектептің негізгі құрамында шабуылшы сапында өнер көрсеткен болатын. 
Сонымен бірге, оның ойлау қабілеті, сөйлеу өнері адамдарды ерекше таң қалдыратын. Мен, мұның бәрі Ерланның өзінің кітапқа деген сүйіспеншілігінен деп ойлаймын. Өйткені, оның сол кездегі үйінің өзі бір кітапхана болатын. Сол кітаптарды ағасы Бейбіт екеуі жарыса оқығанда біз таң - тамаша болатынбыз. Кітаптың көп болуы да кездейсоқ емес, себебі, жоғарыда айтқанымыздай Ерланның әке-шешесі Хисмет ағамыз бен Майра анамыз сол кездегі Гурьев педагогикалық институтында қызмет жасайтын ғалым - оқытушылар болатын. 
Ерлан Гурьев педагогикалық институтының 1993 жылғы түлегі. Ол өзінің өмір жолын Атырау қоршаған ортаны қорғау прократурасында қатардағы прокурорлық жұмысынан бастады. Кейін өмір ағымына байланысты кәсіпкерлік жолға түсіп, осы бағытта да көптеген жетістіктерге жетті. Табысқа тоқмейілсіп кетпей, айналасындағы көптеген адамдарға қол ұшын беруді бір мезетте болса да  тоқтатқан емес. Бүгінгі таңда осы сала бойынша нағыз білгір кәсіпкер, меценатқа айналған азамат болды. 
Ерлан Хисметұлы отбасылы. Өзінің жан жары Бәтима екеуінің арасынан дұниеге екі ұл, бір қыз бала дүниеге келді. Үлкен ұлы Нұрлыбек Алматыдан жоғарғы оқу орнын логистика мамандығы бойынша бітірген маман болса, кіші ұлы Талха мектеп қабырғасында оқушы. Кші ұлы Талха да спортқа жақын. Ол спорттың грипплинг түрімен айналысып бұл күнде Қазақстанның чемпионы атағын да алып үлгерді. Ал, Табылдиевтар әулетінің гүлі Құралай ол әулеттің еркесі, қазір бастауыш сыныпқа мектепке барып жүрген жайы бар.
Қазіргі кезде Ерлан Хисметұлы өзінің негізгі қызметімен айналыса жүріп, қоғамдық жұмыстардың да басы - қасынан табылып жүр. Қайырымдылық жұмыстарын өз өмірінің өзегі етіп алғандай. Соңғы сондай іс-шараларының бірін айтатын болсақ, ол қаламыздағы негізгі «Мұнайшы» футбол алаңын қалыпқа келтіріп, заманауи талапқа сай жабдықтай білді. Осы ерен еңбегі үшін Атырау халқының спорт сүйер қауымының қошеметіне бөленіп, Атырау облысының әкімі Ноғаев Нұрлан Асқарұлы да үлкен ризашылығын жұртшылық алдында білдірген болатын. 
Бұл «Мұнайшы» футбол алаңының орны Ерлан үшін ерекше болатын. Себебі әкесі Хисмет Бозанұлы осы футбол ойынының өмір бойына негізгі жанкүйері болған. Хисмет ағамыз осы алаңда футболдан өтетін жарыстардың қашан өтетіндігі туралы бәрін алдын-ала біліп отыратын. Футбол десе, спорт десе ішкен асын жерге қоятын Хисмет ағамыз тек жәй ғана қызықтап қана қоймай, әрбір спортшының өмірбаянын да жатқа білетін. 
Сонымен қатар, қазіргі уақытта Ерлан өзінің әке-шешесі көп жылдар бойы жұмыс істеген Х.Досмұхамедоа атындағы Атырау мемлекеттік университетінің ұжымына да ерекше назар аударып келеді. Ондағы әкесінің атына ашылған оқу аудиторияларын жасақтауда, көптеген студенттерге әкесінің атындағы шәкірт ақылар мен оқу ақыларын төлеуде көптеп көмектесіп келеді. Тек биылғы оқу жылының өзінде екі студенттің оқу ақысына көмек беруде.
Ерлан осындай ізгі жұмыстардың басында өзі ғана болмай, өзі секілді азаматтарды   топтастыра алады. Сондай үлкен азаматтардың қатарында өзінің әріптестері, достары6 інілері Тоғаев Арман, Абзал Жанесенов, Баязитов Ғаділбек, Нұржан Булканов,  Хамидулла Абай сияқты азаматтарды астын сызып ауыз толтырып айтуға болады.  Осы бір азаматтармен біріге жүріп қаншалықты қайырымды, ізгі істердің тындырылғанын жіпке тізіп  бәрін бірдей айтып тауысу мүмкін емес.
Атырау облысы, дене шынықтыру және спорт басқармасы мен Ерлан Хисметұлы басқарып отырған Атырау облысы жауынгерлік өнер ассоциациясы еліміз бойынша «Ең үздік аймақ» номинациясын жеңіп алды. Бұл шара бойынша еліміздің астанасы Нұр-Сұлтан қаласында 2019-шы жылдың 6-шы шілдесінде өткен бүкіл Қазақстанның жауынгерлік фестивалі қорытындыланып, Атырау облысы осы номинацияны иемденген болатын. Атаулы шараға елімізден 10 000-ға жуық көрермен жиналып, Қазақстан Республикасының президенті Қасым-Жомарт Кемелұлы Тоқаев өзі қатысып номинацияны табыстаған еді. 
Әрине осы бір еңбектерінің, қайырымды  істерінің бәріде ел үшін елеусіз қалмайтыны белгілі. Бірақ, барлық марапаттардың ішінде Ерекең өзінің халқынын, айналасындағы адамдардың ықыласына, алғысына, солардың негізгі марапатына бөленіп жүрген азамат. 
Адам ізгі қасиеттер арқылы ғана бақытқа жете алады. Демек, адам болу - қайырымды болу арқылы ғана келеді екен. Осы орайда ұлы ойшыл Аристотельдің мынадай пікірі талассыз келетіндігі белгілі. «Ақиқат ең басты мәселе, ең биік игілік, қасиетті құндылық – қайырымдылық. Ал, қайырымдылық пен адамгершілік егіз, бірінсіз – бірінің бар болуы, оның болмысқа айналуы мүмкін емес. Әр нәрсе де өзінің мәнімен, өзіндік қасиетімен қадірлі, құнды әрі бар бола алады». Демек, адам өмірінің мәні мен қасиеті - оның адамгершілігі мен  қайырымдылығы арқасында қадірлі, әрі абзал болмақ. 
Сондықтан да, оқырман қауым еліміздің осындай абзал азаматы Ерлан Хисметұлын бүгінгі таңдағы ізгі істерінің арқасында жеткен жетістіктерімен әрі мүшел жасымен құттықтай отырып, деніне саулық, отбасына амандық, ұзақ ғұмыр және болашақта да осындай қоғамымызда болып  жатқан көптеген әлеуметтік – қайырымдылық мәселелердің басы-қасына табылуына шынайы тілектестігімізді білдіреміз.

Аймұратов Сәлімгерей Болатқалиұлы – философия ғылымдарының кандидаты, доцент.

Тізімге қайта оралу