20.09.2019 951

Елбасы Н.Ә.Назарбаев 2019 жылды «Жастар жылы» деп атаған болатын. Осы орайда Х.Досмұхамедов атындағы Атырау мемлекеттік университетінде жастардың өз пікірін еркін айтуға, басқаның пікірін сыйлай білуге, мамандықты дұрыс таңдауда жүйелі көзқарас және қоғамға деген азаматтық позициясын қалыптастырып, патриоттық тәрбиеге баулуды мақсат еткен тренинг өтті.

Мәслихат хатшысы Ринат Бауыржанұлы, қалалық әкімдіктің кадр бөлімінің бас маманы Айнұр Наубекова қатысқан тренингті «Жас Отан» жастар қанатының Атырау облыстық филиалының төрағасы, депутат Ринат Ғилажев ашып, жүргізіп отырды. Университетіміздің студенттері қатысқан басқосуда алдымен мәслихат хатшысы мамандық таңдауда жүйелі көзқарас қалыптастыруға ұмтылысты ояту бағытында пікірін айтты.
- Жастар қоғамның қозғаушы күші, жарқын болашақ кепілі. Ал, еліміздегі кез келген жас қоғам өміріне етене араласып, өзінен кейінгіге үлгі бола білу үшін алдымен мамандықты дұрыс таңдай білуі қажет. Белгілі ғалымдардың қайсыбірін танып-білсек те өмір дерегіне, қоғамдағы рөліне зер салсақ, олар білімді алдыңғы орынға қойған. Олар қаншама білімді болып белгілі бір салада қызмет етсе де басқа да қырынан таныла білудің жолын іздеген. Қазіргі таңда жастар үшін қандай салаға болмасын еңбек етуге дайын, өзін қай қырынан да көрсеткісі келетіндерге мүмкіндіктер жетіп артылады. Тек білімділік және жаңашылдық пен ізденістен бас алмау керек. Сонда ғана бір ғана мамандық емес бірнеше мамандықты игеріп, қоғамға белсенді араласатын нағыз тұлға қалыптасады,-деді Ринат Бауыржанұлы.
Сонымен қатар, қалалық әкімдіктің кадр бөлімінің бас маманы Айнұр Наубекова мемлекеттік қызмет және әкімдіктердегі бос орындар туралы түсінік берді. Ал, «Жас Отан» жастар қанатының Атырау облыстық филиалының төрағасы, депутат Ринат Ғилажев студенттерге қазіргі таңда еңбектенген, ізденген, талаптанған әрбір азамат пен азаматшаға лайықты жұмыс табудың қиындығы жоғын жеткізді. Сондай-ақ, мемлекеттік қызметтің қазіргі жүйесі бұрынғыға қарағанда едәуір жеңілдегенін және онда қызмет орналасуға ешбір таныс-тамыр қажет етпейтінін, тек белгіленген талап мен тестілеуден өтіп, айлық жалақысы мардымсыз демей еңбек еткен адамға мемлекеттік қызметтің беретін мүмкіндігі көп екеніне тоқталып өтті. Диплом алып бос жүрген жастар үшін жұмыссыздыққа тіркеліп, жастар тәжірибесі арқылы да мемлекеттік қызметке орналасуға мүмкіндік барын айтып, мемлекеттік қызметші болуға шақырды.
Тренингте студенттер өздерін толғандырған сауалдарына толық жауап алды. Шара соңында бір топ жастар мәслихат хатшысының Алғыс хатымен марапатталды.

Тізімге қайта оралу