«Толеранттылық: ерекше білімді қажет ететін балалармен қатынас» тақырыбында тәжірибе алмасты
18 сәуірде Х.Досмұхамедов атындағы Атырау мемлекеттік университеті, Инновациялық білім беру факультеті, Психология және арнайы білім беру кафедрасының ұстаздарымен және 3 курс Дефектология мамандығының студенттерімен «Рухани жаңғыру» бағдарламасы аясында, университеттің 70 жылдығына арналған іс-шаралар жоспары негізінде«Толеранттылық: ерекше білімді қажет ететін балалармен қатынас» тақырыбында тәжірибе алмасу үшін семинар ұйымдастырылды.
Психология және арнайы білім беру кафедрасы психология, педагогика және психология мамандықтарымен қатар, дефектолог-логопед мамандықтарын дайындауда. Семинар жұмысының мақсаты – арнайы білім беру мекемелеріндегі педагогтың жеке тұлғасы мен кәсіби қызметі жайында студенттерге Арнайы білім беру мекемелерінен келген қонақтардың өз тәжірибелерімен бөлісу және болашақ мамандардың дайындығы, инклюзивті білім берудің мақсат-міндеттері туралы ой қозғау. 1995 жылы 16 қарашада ЮНЕСКО-ның Бас конференциясы Толеранттылық қағидаттары туралы декларация қабылдады. 1996 жылы Толеранттылық жылы, ал 16 қарашаны Толеранттылықтың халықаралық күні деп жариялады.
«Толеранттылық» сөзі латын тілінен француз тіліне, кейін еуропа тілдеріне енген, оны «төзімділік» деп аударып жүрміз. Ғалым А.Айталының пікірінше, шындығында толеранттылықтың мәні қазақ тілінде – терең: төзімділік, шыдамдылық, ымыраластық, байсалдылық, кісілік, ізгілік, кемелін таңдау, келісімін табу деп жалғастыра беруге болады. «Толеранттылық қағидалары туралы декларацияда» бұл ұғымға мынадай түсініктемелер берілген: толеранттылық біздің дүниеміздің мәдениетінің көп түрлілігін, адамның жекелігінің өзін білдіру формаларына және көрініс тәсілдеріне сыйлаушылықты, қабылдауды және түсінуді білдіреді.
Өзекті мәселеге арналған шараны психология ғылымдарының кандидаты, Психология және арнайы білім беру кафедрасының қауымдатырылған профессоры Жаңылсын Сабирова жүргізіп отырды. Семинар барысында тақырыпқа байланысты, яғни ерекше білім беруді қажет ететін балалармен жұмыс, жергілікті жердегі инклюзивті білім берудің жағдайы туралы қонақтар өз баяндамаларын жасап, жас мамандарға ұсыныс-тілектерін білдірді. Тіл мүкістігі бар балалардың облыстық №3 арнаулы мектеп-интернатының дефектологы Райгүл Кенжеғали «Тіл мүкістігі бар балаларды оқытудағы логопед, дефектолог мамандардың мақсат-міндеттері», облыстық балалар оңалту орталығының логопед маманы Айдаана Рахымғалиева «Ерекше балаларға ерекше көмек», Атырау облыстық балалар ауруханасының логопед маманы Жарқынай Сұлтангереева «Емханадағы логопед маманның қызметі және міндеттері», «№1 Психологиялық медициналық педагогикалық консультация» ММ маманы Гүлжанар Кубиева «Психологиялық медициналық педагогикалық консультация» қызметі, Атырау қалалық №20 «Алтын балық» сөйлеу қабілеті бұзылған балаларға арналған мектепке дейінгі арнайы мекеме логопед маманы Гауһар Дайрабаева «Мектепке дейінгі арнайы мекемедегі логопедиялық қызметтің ерекшелігі», «№3 Арнаулы әлеуметтік қызметтер көрсету орталығы» КММ мекемесінің әдіскері Алмагүл Залжанқызы «Арнаулы әлеуметтік қызметтер көрсету орталығындағы логопед, дефектолог мамандардың жұмыс ерекшеліктері», «Атырау. Маленькая страна» оңалту орталығының жетекшісі Ерлан Күмісқалиев «Мүмкіндігі шектеулі балалармен жүргізілетін оңалту жұмыстарының әдістері», доцент Айжан Каженбаева «ЖОО-дағы инклюзивті білім беру», «Инклюзия Болашақ Атырау» ҚБ төрайымы Арай Нугманова «Әр бала білім алуға құқылы», №6 М.Мөңкеұлы атындағы орта мектеп инклюзивті сынып жетекшісі Салтанат Құбайдолла «Ерекше балалардың білім алуындағы тьютордың маңызы», «Венера» инклюзивті шеберханасының директоры Гүлбарам Ермуханова «Венера» инклюзивті шеберханасының қызметі» тақырыбында сөз етті. Семинарды Дефектология мамандығының 3 курс студенті Арайлым Жеңісова «ЖОО-да ерекше білім беруді қажет ететін студенттермен жүргізілетін «Мейірім» волонтерлық тобының жұмысы» туралы баяндады.
Шара кезінде ерекше білім алуды қажет ететін балаларға көрсетілетін қызмет туралы, ерекше балаларды оқытудағы жаңа әдістер туралы әңгіме қозғалып, пікірлер ортаға салынды. Семинар соңында «Психология және арнайы білім беру» кафедрасының меңгерушісі, п.ғ.к. Г.Шұғаева, психология ғылымдарының кандидаты, Психология және арнайы білім беру кафедрасының қауымдатырылған профессоры Ж.Сабирова сөз сөйлеп, қонақтарға алғыс білдіріп, Әлеуметтік мәселелер және жастар саясаты жөніндегі проректор, п.ғ.к., доцент Ляйля Ерболатқызының атынан «Алғыс хат» пен арнайы сыйлықтар табыстады.
ПІКІРЛЕР