Елбасының сыртқы саяси бастамалары – Қазақстанның халықаралық мәртебесі мен беделін арттыру факторы ретінде
2018 жылдың 20 қыркүйегінде Республикасының Тұңғыш Президенті – Елбасы кітапханасы Атырау қаласындағы «Н.Назарбаев: дәуір, тұлға, қоғам» көшпелі көрме жобасын жүзеге асыру аясында «Елбасының сыртқы саяси бастамалары – Қазақстанның халықаралық мәртебесі мен беделін арттыру факторы ретінде» атты дөңгелек үстелін өткізді.
Дөңгелек үстелде алғы сөзді Қазақстан Республикасының Тұңғыш Президенті – Елбасы кітапханасы директорының орынбасары, саяси ғылымдарының докторы, профессор Әмірхан Рақымжанов сөйлеп, сөз кезегін Х. Досмұхамедов атындағы Атырау мемлекеттік университетінің ректоры Абзал Талтеновке берді.
Тәуелсіздік алғаннан бері Қазақстан көптеген белестерді өткерді. Қазақстанның тәуелсіздік жылдары қол жеткізген көпвекторлы сыртқы саясаты егемендігіміз бен мемлекеттілігімізді нығайтып, халықаралық қатынастар мен әлемдік шаруашылық байланыстар жүйесіне енуге ықпал етті. Өткен жылдар ішінде республикамыз бастамалары қашанда халықаралық қолдауға ие болып, тәжірибе жүзінде дәлелденген халықаралық қауымдастықтың толық қанды мүшесіне айналды, барлық көрші мемлекеттермен тұрақты әрі дәстүрлі қарым-қатынасты орнатты. Сенімді және салмақты серіктес ретінде республикамыздың халықаралық имиджі қалыптасты.
Әлемдік қауымдастықтағы Қазақстанның табысты интеграциясы ҚР Тұңғыш Президенті – Елбасы Нұрсұлтан Назарбаевтың ерен еңбегінің арқасында жүзеге асқаны баршаға мәлім. Елбасының бастамалары Қазақстанды әлемдік қауымдастықтарда танымал етті. Бұған қоса еліміз бітімгершілік бастамаларымен, соның ішінде ядролық қарусыздану және оны таратпау идеяларымен үнемі бастама көтеріп отырады.
Осыған орай саяси, экономикалық, сауда салаларының екіжақты және аймақтық байланыстарын трансформациялау тұрғысындағыҚазақстанның көпвекторлы саясатының өзекті мәселелері сарапшылар қауымының талқылауына ұсынылады. Еліміздің ұлттық қауіпсіздігін қамтамасыз ету мәселелерін талқылау барысында Қазақстан Республикасы Президентінің жүргізіп отырған саясаты тұрғысындағы энергетикалық қауіпсіздік басты назарға алынды.
Елбасының жаһандық және аймақтық қауіпсіздікті нығайтудағы бастамалары, Қазақстанның бітімгершілік миссиясы мен Мемлекет басшысының рөлі, сондай-ақ Қазақстанның әлемдік аренадағы имиджінің мәні мен маңызы жеке қарастырылатын болды.
Дөңгелек үстелдің жұмысына ғылыми қызметкерлер, сарапшылар, жоғары оқу орындарының басшылары мен оқытушылары, докторанттар, магистранттар, студенттер және де облыс орталығы кәсіпорындарының өкілдері қатысты.
ПІКІРЛЕР