Дүниежүзі тарихын оқытудың өзекті мәселелері талқыланды
12 сәуір – ғылым қызметкерлері күніне орай университеттің Қазақстан және дүниежүзі тарихы кафедрасының ұйымдастыруымен «Дүниежүзі тарихын оқытудың өзекті мәселелері» тақырыбындағы ғылыми семинар өтті. Кафедра жанындағы тұрақты ғылыми семинардың кезекті мәжілісі кеңейтілген сипатта өтіп, оған Атырау қаласы жалпы білім беретін мектептерінің тарих пәні оқытушылары қатысты.
Іс-шара жалпы білім беретін орта мектептер мен жоғары оқу орындарында дүниежүзілік тарихты оқытудың өзекті мәселелері бойынша тарихшы оқытушылар арасында диалогтық алаң құру, әлемдік және отандық тарихтың өзара сабақтастығы мен ерекшеліктері жайында теориялық, әдіснамалық, әдістемелік тұрғыда өзара пікір алмасу мақсатында ұйымдастырылды.
Ғылыми семинар барысында дүниежүзі тарихын оқытудың жаңартылған білім бағдарламасы негізіндегі әдістері мен тәсілдері мектеп мұғалімдері мен ЖОО профессорлары қатысуымен анықталып, талқыланды, әлемдік тарихтың өзекті мәселелерін мектеп курсында оқыту бойынша ұсыныстар, заманауи көзқарастар мен пікірлер таныстырылды.
«Дүниежүзі тарихын оқытудағы ғылыми көзқарас» тақырыбында т.ғ.к., асс.проф., Жұмазия Жұмабаева сөз сөйлеп, қазіргі кездегі әлемдік тарихқа көзқарас, жаһандану кезіндегі тарихи мәселелер, теориялық методологиялық мәселелер жайына тоқталды.
Тарих ғылымдарырының докторы Лесқали Бердіғожин мектеп оқушыларына ғылыми жобаларға тақырыптар ұсыну жайындағы өз ойларын ортаға салды. Жалпы кафедра ұстаздары мектеп тарихшыларымен бірлесе оқушылардың ғылыми жобаларын нәтижелі болуда. Биылғы жылдың өзінде Атырау қаласындағы №30 дарынды балаларға арналған үш тілде білім беретін мектептің тарих пәнінің мұғалімі Мәнет Утепқалиева мен тарих ғылымдарының кандидаты Гулфайруз Қайырғалиеваның өзара шығармашылық байланысы негізінде орындалған жұмыстың республикалық сайыста жүлделі орын алғанын атап өтуге болады.
Ғылыми семинарда мектеп мұғалімдері өз іс-тәжірибелері барысында өткізген дүниежүзі тарихы сабақтарындағы жаңа бағдарлама бойынша жасақталған сабақтарын ұсынып, сабақтары талданып, теориялық, әдіснамалық, әдістемелік тұрғыда өзара пікір алмасты. Қорытында сөзді Қазақстан және дүниежүзі тарихы кафедрасының меңгерушісі PhD доктор Динара Хамидуллина алып, қатысушыларға арнайы сертификаттар табыстады.
Динара ХАМИДУЛЛИНА,
Қазақстан және дүниежүзі тарихы кафедрасының меңгерушісі
ПІКІРЛЕР