Үндестіктер патшайымы
Осындай атаумен ҚР білім беру ісінің үздігі, ҚР білім беру ісінің құрметті қызметкері Республикалық және халықаралық конкурстардың лауреаты, хормейстр, дирижер, ұстаз Мақыш Гайсинаның 75-жылдық мерейтойына және ұстаздық еңбек жолына 55-жыл толуына арналған шығармашылық кеші өтті.
Өнерде шекара жоқ әсіресе жанды дауыста ән шырқайтын әншілер қашанда халықтың арасында ең жоғары бағаланады. Соның ішінде өнердің биік шыңы хормен ән айту. Құрманғазы атындағы мәдениет үйінде өткен шараны халықаралық конкурс, фестивальдардың лауреаты Х.Досмұхамедов атындағы Атырау мемлекеттік университетінің хоры «Мың бала» әнімен ашты.
Кеш барысында, Атырау мемлекеттік университетінің ректоры х.ғ.д., профессор Абзал Талтенов құттықтау сөзін сөйлеп, «Х.Досмұхамедов атындағы Атырау мемлекеттік университетіне сіңірген еңбегі» үшін атты төсбелгімен марапаттады.
Шәкірттерінің бірі облыстық ғылыми-әдістемелік халық шығармашылығы мен мәдени демалыс қызметтерін ұйымдастыру орталығы басшысының міндетін атқарушы Бақытбек Сартбаев ұстазын мерейтойымен құттықтап, сондай - ақ, облыстық мәдениет, мұрағаттар және құжаттама басқармасының басшысы Саламат Сабыр атынан құттықтау хатын табыстады.
Айта кетсек, Республикаға танымал композитор, көптеген музыкалық жобалардың продюсері Ринат Гайсин Мақыш апайдың мақтан тұтар шәкірті.
Мерекелік кеште апайдың шәкірттері бірнеше конкурстардың жеңімпазы Хамиль Сүйекбаев, «ЖасSTAR» дуэті, «Рауан», «Кварто», «Кантилена», «Нармин» вокалдық ансамбльдері, Республикалық «Дельфийлік ойындар» фестивалінің жеңімпаздары Айбар Ғаниұлы, Азамат Ізбасаров пен қатар, Атырау музыка колледжі хоры, Дарын ер балалар хоры, Кіші өнер академиясының хор ұжымдары өз өнерлерін паш етті.
Алтынай Сәлімгерейқызы,
медиа-қызмет орталығының тілшісі
ПІКІРЛЕР