Көпэтносты қоғамды дамытудың Қазақстандық тәжірбиесі
Х.Досмұхамедов атындағы Атырау университетінде Қазақстан халқы Ассамблеясы құрылғанына 30 жыл толуына орай «Көпэтносты қоғамды дамытудың қазақстандық тәжірибесі» атты республикалық ғылыми-практикалық конференциясы өтті.
Қазақстандық патриотизм, Қазақстан халқының бірегейлігін және бәсекеге қабілетті ұлтты қалыптастыру процесінде Қазақстан Республикасында этносаралық келісімді қамтамасыз ету мақсатында ұйымдастырылған конференцияға ғылыми-сараптамалық топ мүшелері, «Ассамблея жастарының» өкілдері, Аналар кеңесі, Ақсақалдар кеңесі, Ассамблея ардагерлері және БАҚ өкілдері қатысты.
Жиында Х.Досмұхамедов атындағы Атырау университетінің басқарма төрағасы – ректор Саламат Идрисов Ассамблея мүшелерін мерейтоймен құттықтап, «AMANAT» партиясы Атырау облыстық филиалының төрағасы Абдолла Идресов құттықтау сөз сөйледі.
Ал, конференцияда Қазақстандық татар және башқұрт конгресі басқармасының төрағасы Тауфик Каримов, «Қоғамдық келісім» КММ басшысы Ляззат Джылқышиева, ҚХА ардагері Жаннат Асабаева, Қазақстан тарихы академиялық басылымын үйлестіру орталығының директоры Әуезхан Шашаев, тарих ғылымдарының докторы, профессор Жамиға Таңатарова, тарих ғылымдарының докторы Ұзақбай Исмагулов, тарих ғылымдарының кандидаты Болат Нығметов, «Былина» орыс этно-мәдени бірлестігінің басшысы Андрей Кораблев, тарих ғылымдарының докторы Лесқали Бердығожин және конференцияға онлайн қосылған Қазақстан Республикасы Президентінің жанындағы Ұлттық құрылтай мүшесі Ахмет Мурадов, мемлекет тарихы институты директорының орынбасары Бүркітбай Аяған, РФ Астрахан қаласынан «Жолдастық» қоғамы төрағасының орынбасары Әлия Ғұмарова, Батыс Қазақстан облысы, Орал қаласынан қазақстан педагогикалық ғылымдар академиясының академигі Абат Қыдыршаев сынды ғалымдар мен конференцияға қатысқан қоғам белсенділері баяндамалар жасады.
«Қазақстан халқы ассамблеясының іс-шаралары мен жобалары еліміздің әлеуметтік және саяси өмірінде айтарлықтай орын алып, елдегі бірлік пен тұрақтылықты сақтауға бағытталды. Соның ішінде, ҚХА жанынан қайырымдылық шараларымен айналысу мақсатында ашылған «Жомарт жан» орталығын атап өтуге болады. 2024 жылдың қорытындысы бойынша орталық 60 жуық түрлі шара өтікізіп, 3000 астам адамға 31 млн теңге көмек берді. Сонымен қоса елімізде су тасқыны болған уақытта, табиғи апаттан зардап шеккен адамдарға көмек беру үшін «Жүректен жүрекке» қайырымдылық жобасы жүзеге асты», - дейді «Қоғамдық келісім» КММ басшысы Ляззат Джылқышиева.
Конференцияда көтерілген маңызды мәселелердің бірі – мемлекеттік тіл ахуалы. Көпұлтты елімізде өзге этнос өкілдеріне қазақ тілін үйретудің тәсілдері туралы «көптеген этнос өкілдерінің өзара қарым-қатынас тілі қазақ тілі болуы қажет. Өзге ұлттардың қазақ тілін мәжбүрлеусіз үйренуінің маңызын мемлекет басшысы Қасымжомарт Тоқаевта өз сөзінде айтқан болатын. Осы мәселенің шешімі ретінде «Былина» бірлестігі 3 жыл көлемінде әр апта сайын бірлестік кітапханасында қазақ тілін үйрету сабақтарын ұйымдастырып келеді. «Ауызекі сөйлеу тіліне жол» деп аталатын сабақтар өзара сөйлесу, қазақша ән айту сияқты форматтарда өтеді», - деді «Былина» орыс этно-мәдени бірлестігінің басшысы Андрей Кораблев.
Конференция соңында көп жылдардан бері Атырау университетімен тығыз байланыс орнатып, көптілді білім беру факультетінде орыс әдебиеті кабинетін жасақтауға демеушілік танытқан, «Былина» орыс этно-мәдени бірлестігінің басшысы Андрей Кораблевке Атырау университеттің Құрметті профессоры атағы берілді.
ПІКІРЛЕР