- Басты бет
- МЕДИА-РЕСУРСТАР
- Жаңалықтар
- Астрахандағы қазақ жастарының Қазақстанда оқу мәселесі талқыланды
Астрахандағы қазақ жастарының Қазақстанда оқу мәселесі талқыланды

Х.Досмұхамедов атындағы Атырау университетінде Тіл және мәдениет «Жолдастық» қоғамына 35 жыл толу қарсаңында Астрахан қазақтары «Жолдастық» бірлестігі төрағасының орынбасары Әлия Гумаровамен кездесу өтті.
Университеттің профессор-оқытушылар құрамы қатысқан жиында Астрахандағы қазақтардың, әсіресе жастардың Қазақстанда білім алу мүмкіндіктерін талқылау және диаспора өкілдерінің рухани байланыстарын нығайту мәселелері сөз етілді.
Әлия Елеусінқызы – Х.Досмұхамедов атындағы Атырау университетінің түлегі, Астрахандағы қазақ диаспорасының белсенді өкілі.
«Бүгінгі кездесу – екі ел арасындағы ынтымақтастықты нығайту, Астрахан облысындағы қандастарымызбен байланысты арттыру мақсатындағы көптен жоспарлап жүрген іргелі жұмыстарымыздың бірі. Биылғы жылдан бастап жолдастық байланысымызды одан әрі дамытып, күшейтуге мүмкіндіктер туып отыр. Осы мақсатта жолдастық байланыс құрып, оқу орнымызға арнайы келгеніңізге алғыс білдіреміз», - деп, басқарма төрағасы-ректор Саламат Идрисов Әлия Елеусінқызына университет атынан алғыс хат табыстады.
Жиында Атырау облыстық ардагерлер кеңесінің төрағасы Мұрат Өтешов, Атырау университеті ардагерлер кеңесінің төрағасы Шахман Нағимов, «Сарайшық» әдеби-танымдық журналының редакторы Гүлзада Ниетқалиева сынды құрметті тұлғалар ашық пікір білдіріп, сөз сөйледі.
Іс-шара барысында Әлия Елеусінқызына Атырау облысының құрметті азаматы Мұрат Сақтайұлы Атырау облыстық ардагерлер кеңесі атынан «Хиуаз Доспанова атындағы» төсбелгіні және Астрахан қазақтары «Жолдастық» бірлестігіне арнайы алғыс хат табыс етті.
«Екі іргелі ел арасындағы достығымызды нығайтып, жаңа жылдың басында шақырып, құрмет көрсетіп жатырғандарыңызға алғыс айтамын. Шетелде жүріп, өз еліңе келу өте ерекше сезім қалдырады. 1991 жылы Х.Досмұхамедов атындағы Атырау университетін тәмамдап, арнайы шақыртумен Астрахан облысында еңбек еттім. Еңбек жолымда қолдан келгенше тілімізді жастарға үйретіп, төл тарихымызды дәріптеу ісінде Атырау облысы көп көмектесті. Бүгінде екі ел басшыларының шешімімен Оренбург, Омск, Астрахан қалаларында қазақ мектептері ашылғалы жатыр. Бұл - мен үшін қуанышты жаңалық. Алдағы уақытта жоғары оқу орындарымыздың арасында да байланысымыз нығая берсін!»,- деді Астрахан қазақтары «Жолдастық» бірлестігі төрағасының орынбасары Әлия Гумарова.
Кездесу соңында қатысушылар арнайы келген қонаққа ризашылығын білдіріп, естелік суретке түсті.
ПІКІРЛЕР