Студент іс-тәжірибеде жұмысқа қабылданады

Студент іс-тәжірибеде жұмысқа қабылданады

Атырау университетінің студенттері қаңтар айынан бастап  іс-тәжірибеден өтіп жатыр. Педагогикалық мамандықты бітіретін түлектерді мекеме басшылары жұмысқа қабылдауға ниетті.
 Оқу орнында педагогикалық бағыт бойынша 3912 студент білім алады. Ал, биыл 1069 студент оқуын аяқтайды.  

Орыс филологиясы мамандығында  оқитын Айдана Төлегенова: 
«Бала күнгі арманымды орындауға  бір табан жақындадым. 5 сынып оқушыларына дәріс беріп жүрмін. Университеттегі теориялық білімді іс-жүзінде тәжірибеде ұштастыру арқылы алғашқы ашық сабағымды сәтті өткіздім. Мектеп педагогтары бізге бірегей дағдыларды үйретіп жатыр. Болашақта мұғалім болатыныма сенімдімін», - дейді  Мағжан Жұмабаев атындағы орта мектебінің практиканты. 

Университет білім алушыларды іс-тәжірибеде шыңдау үшін 400-ге жуық ұйыммен келсім-шарт жасаған. Олардың қатарында болашақ педагогтарды жұмысқа қабылдайтын 73 білім беру мекемесі бар.

 Атырау спорт клубының директоры Тимур Үкібаев:
 «Атырау университетінің студенттерін болашақта жұмысқа қабылдаймыз. Олар футболшы балаларға бапкер болады. Практикант Есімхан Жұбанов іс-тәжірибеде өзінің еңбекқорлығымен көзге түсті. Жақсы методикамен жаттығуларды өткізіп, біздің бапкерлерге көмектесіп жатыр», - дейді. Аталған студент оқу орнын дене шынықтыру мамандығы бойынша тәмамдайды. 

 Биыл оқу бітіретін педагогтардың қатарында 889 студент мемлекеттік тілде, қалған 180-і орыс тілінде білім алған. Университет түлектері толықтай  іс-тәжірибеден өткен білім беру мекемелеріне жұмысқа орналасады деген сенім бар.

ПІКІРЛЕР

Тізімге қайта оралу