18.05.2023 365

Х.Досмұхамедов атындағы Атырау университетінің Ардагер ұстазы Хамметов Асылбек Хамметұлының мерейлі 80 жасқа толуына арналған «Ғылым мен білім берудегі сандық трансформация» атты республикалық ғылыми-тәжірибелік конференциясы өтті. Жиынға еліміздің ғылыми орталықтарының ғалымдары, студенттер, магистранттар, мектеп пен арнайы білім беру мекемелерінің мұғалімдері, мерейтой иесінің шәкірттері қатысып, өз құттықтауларын жеткізді. «Өңірімізде және тұтастай алғанда елімізде Сіздің шәкірттеріңіз барлық ғылым салаларында табысты еңбек етіп жүрген мыңдаған түлектің ризашылығы- өзіңіздің педагогикалық қызметіңіздің нәтижесі деп білеміз. Еліміз әрқашан өзіңіз сияқты отаншыл, әрі білімді азаматтарға арқа сүйейді. Ел болашағы-жастарымыздың ұлттық рухын оятып және отаншылдық санасын тереңдетіп, мемлекеттік идеология қалыптастыруға ат салысып келесіз. Жарқын болашақ үшін сіңірген еңбегіңізге алғыс білдіреміз»,- деді «Кенесары Хан» қоғамдық қорының Президенті Мұхтархан Абаған. Университет ұжымы атынан Басқарма төрағасы- ректор Саламат Идрисов құттықтау сөз сөйлеп, мерейтой иесінің ғылым, білім саласына сіңірген елеулі еңбегін атап өтіп, Асылбек Хамметұлына Халел Досмұхамедов медалін табыстады. Сонымен қатар, Атырау облыстық ардагерлер кеңесінің төрағасы Мұрат Сақтайұлы талай жастарды тәрбиелеп, білім берген ұстазды «Тәлімгер» төсбелгісімен марапаттады.
Конференция секциялық жұмыстармен жалғасады.

Тізімге қайта оралу