12.07.2022 933

12 шілде күні Атырау облысы Өңірлік коммуникациялар қызметінде "Жоғары оқу орнына түсудегі жаңалықтар, білім грантына құжат тапсыру ерекшеліктері, Атырау өңіріне арнайы бөлінген гранттар" тақырыбында брифинг өтті. Брифингке әлеуметтік мәселелер және жастар саясаты жөніндегі проректоры Ләйлә Ерболатқызы, қабылдау комиссиясының жауапты хатшысы Рауза Абылайқызы қатысты. 2022-2023 оқу жылында бакалавриатқа түсу үшін 56 мыңнан астам грант бөлініп отыр. Биылғы ерекшелік, Президенттің тапсырмасы бойынша гранттардың жалпы саны 5000-ға артты. ҚР Еңбек және халықты әлеуметтік қорғау министрлігінің деректеріне және жұмыс берушілердің сұранысқа ие мамандықтар туралы ақпаратына сәйкес, гранттар инженерлік, өңдеу және құрылыс салаларына мен педагогикалық ғылымдарға көптеп бөлінген. Сондай-ақ, биыл «тығыз қоныстанған және батыс өңірлердің жастарын жетекші жоғары оқу орындарында оқыту үшін арналған мемлекеттік білім беру тапсырысына» сәйкес, батыс өңірдегі екі облыстың түлектері үшін "Атырау-Маңғыстау" нысаналы гранты белгіленді. Ол бойынша Атырау облысына 4000 грант (Маңғыстау облысына 6000 грант) қарастырылған, яғни, атыраулық мектеп бітіруші түлектер Қазақстанның 40-тан астам жоғары оқу орнына арнайы тізімде көрсетілген мамандықтар бойынша грантқа түсіп оқи алады. Толығырақ Атырау университетінің сайтында талапкерлер бөлімінен оқи аласыздар. Ол туралы брифинг барысында Астана AIU университетінің өкілі Жанар Сағалиева мен Қазтұтынуодағы Қарағанды университетінің өкілі Алмас Орынбеков айтып берді. Білім грантына құжаттар қабылдау, Атырау өңіріне арнайы бөлінген гранттар, педагогикалық және басқа да мамандықтарға қойылып отырған талаптар жөніндегі сауалдарға брифинг барысында жауап берілді. Естеріңізге сала кетейік, Х.Досмұхамедов атындағы Атырау университетінде 13 шілде күні білім беру гранттарын тағайындау конкурсына қатысу үшін өтініштерді қабылдау басталып, ол 20 шілдеге дейін жалғасады.

Тізімге қайта оралу