30.06.2022 681

Ғалым, ұстаз Халел Досмұхамедовтің аты берілген, өңірдегі бірден-бір іргелі оқу орындарының бірі - Х.Досмұхамедов атындағы Атырау университеті 30 маусым күні биылғы оқу жылының соңғы бітіруші түлектеріне диплом табыстау шарасын өткізді. Бүгінгі дипломмен марапаттау салтанаты инновациялық білім беру факультетінде өтті. Шараға Басқарма төрағасы-ректор Саламат Нұрмұханұлы, әлеуметтік мәселелер және жастар саясаты жөніндегі проректор Ләйлә Ерболатқызы мен әрбір бітіруші студент үшін маңызды әрі қуанышты күні жандарынан табылуды құп көрген ата-аналары және университеттің ғалым оқытушылары қатысты. «Бүгіннен бастап әр түлек үшін өмірде жаңа кезең басталады. Осы жолда алған білімдеріңізді ақтап, еліміз бен өңіріміздің дамуына, университетіміздің өркендеуіне баршаңызды атсалысуға шақырамын. Өмір жолында сүрінбей, алған білімдеріне сай адал қызмет етуге және бүгінгідей жанұя қуанышының еселене беруіне тілектестік білдіремін.Сонымен қатар, бірнеше жыл сіздерге білім берген профессор-ұстаздарды да құттықтаймын. Біліммен қатар, қоғамда қалыптасып дамуларыңызға осы ұстаздардың қосқан рөлі өте зор»,- деді Саламат Нұрмұханұлы. Айта кетейік, аталмыш факультетті биылғы оқу жылында педогогика, мектепке дейінгі және бастауыш білім беру, психология және арнайы білім беру, дене шынықтыру және БӘД, дене тәрбиесі мамандығы бойынша 491 түлек тәмәмдап отыр. Оның 28-і үздік диплом иегері атанды. Университет қабырғасында оқи жүріп, қоғамдық жұмыстарда белсенділік танытқан, білімді де назардан тыс қалдырмаған студенттерге «Аманат» партиясының, Атырау облыстық ішкі саясат басқармасының, дене шынықтыру және спорт басқармасының, қала әкімінің және жастар ресурстық орталығының алғыс хаты табыс етілді.

Тізімге қайта оралу