27.06.2022 434

Бүгін, 27 маусым Х.Досмұхамедов атындағы Атырау университетінде физика, математика және ақпараттық технологиялар факультетінің бітіруші түлектеріне диплом табыстау шарасы өтті. Салтанатты жиында университеттің ғылым және халықаралық қатынастар жөніндегі проректоры Еламан Қанатұлы, оқу орнының ардагер ұстаздары және оқытушы ғалымдары түлектерді құттықтап, жаңа өмір жолына аттаған қадамдарына сәттілек тіледі. «Арифметика математиканың, ал математика - ғылымдардың патшасы»,- деп бекер айтылмағаны сөзсіз. Осы ғылым жолында, тұтас дүниенің тұңғиығына беттеген, біліммен қатар, қоғамдық шараларға қатысып, университеттің абыройын асқақтатқан, жастық пен жасампаздық жолында сан түрлі қызықты шақты бастан өткерген студенттер бүгінде жас маман атанды. Осы ретте физика, математика және ақпараттық технологиялар факультетін 188 бакалавр және 21 магистр бітіріп отыр. Оның ішінде, 20 студент үздіктер қатарынан табылды. Жиын барысында осындай қызығы мен қиындығы қатар жүрер студенттік өмірде белсенділік танытып, түрлі сайыстарда жетістікке жеткені үшін 21 студент ректор алғыс хатымен, 31 студент декан алғыс хатымен және де 5 студент «Аманат» партиясы Атырау облыстық филиалының алғыс хатымен және Атырау қаласы әкімдігінің алғыс хатымен марапатталды. Шара соңында диплом табыстау рәсіміне арнайылап келген ата-аналар сөз сөйлеп, ұстаздарға өз алғыстарын жеткізіп, ізгі тілектерін жолдады.

Тізімге қайта оралу