«Ұстаз» мектебі алғашқы түлектерін ұшырды

 Бүгін, 25 мамыр күні Х.Досмұхамедов атындағы Атырау университетінің жанынан құрылған дарынды ер балаларға арналған «Ұстаз» мектебінің алғашқы түлектеріне «Сыңғырла, соңғы қоңырау» атты салтанатты шара өтті. Жас түлектерді ректор Саламат Идрисов, Атырау облыстық білім сапасын бақылау департаментінің басшысы Гүлназ Сүлейменова, филология ғылымдарының докторы, профессор Қадыр Жүсіп, оқу орнының ардагер ұстаздары, оқытушы ғалымдары мен түлектердің бүгінгі шараға арнайылап келген ата-аналары құттықтап, 11 сынып бітірушілерге сәт-сапар тіледі.
 «Еліміздің өркениетті ел болып, сапалы ұрпақ тәрбиелеуде ұстаздардың алатын орны ерекше. Сол жолда сіздер аянбай тер төгіп, білім сапасына, саналы жастардың дамуына үлкен үлес қосып жүрсіздер. Бүгінгі күн - ертеңгі тарих. Бұл күн тарих беттерінде мәңгіге сақталары сөзсіз. «Ұстаз» мектебінің қоғам үшін де, мемлекет мүддесі үшін де орны ерекше екенін айта кетіп, бүгінгі түлектерді шын жүрекпен құттықтаймын. Алда тұрған емтихандардан сүрінбей өтіп, қалаған мамандықтарыңыздың иесі болуға тілектестік білдіремін», - деді Саламат Нұрмұханұлы.
 Болашақ ер мұғалімдерді даярлайтын «Ұстаз» мектебінде 10-11 сынып оқушылары оқиды. Оның ішінде, биыл 63 оқушының 38-і мектеп бітіріп, алтын ұясымен қоштасқалы тұр. Биылғы мектеп бітуші түлектердің арасынан 8 оқушы «Алтын белгіге» үміткер және 2 оқушы «Үздік аттестатқа» үміткер деп танылған. «Ұстаздықтар» түрлі деңгейдегі білім, спорт жарыстарында жүлделі орындардан көзге түсіп, мектеп пен жоғары оқу орнының абыройын асқақтатып келеді.
 Шара барысында бітіруші түлектер жиналғандар алдында өнер көрсетіп, ұстаздарына арнап шығарған жыр жолдарын оқып берді. Салтанатты жиын соңында шараға қатысушылар университет ауласына көшет отырғызды.

Тізімге қайта оралу