Рухани жаңғыру аясында өткен дөңгелек үстел
13 сәуірде Музыка және өнер кафедрасының ұйымдастырыумен «Жаңа әрі өзекті ғылыми-шығармашылық еңбектері» тақырыбында дөңгелек үстел өтті. Кіріспе сөзді кафедра меңгерушісі Е.Ковалева алып, ғылыми редактор, өнер ғылымдарының кандидаты Б.Тұрмағамбетова «Жаңа гуманитарлық білім. Қазақ тіліндегі 100 жаңа оқулық» жобасының «Әлем музыка тарихы» кітабына және «Атырау өлкесінің әндері» антологиясының І томына шолу жасады. Библиографиялық шара «Халық әні» мамандығының студентінің «Жандайшап» әнімен ұласты. Қазақстан Республикасының Мәдениет қайраткері Қ.Кипиев «Атырау өлкесінің әндері» антологиясының ІІ томына тоқталды. Өз баяндамасынан кейін «Батыр бабам - Құлбарақ» атты күй орындады. Қазақстан Республикасының М.Ғабдиев Сатым Әжікеннің «Баян аспабында оқыту әдістемесі» оқу-әдістемелік құралы туралы таныстырылым жасаса, Қазақстан Республикасының білім беру ісінің үздігі М.Гайсина «Музыка теориясы» оқулығы жайлы ортаға салды.
Рухани жаңғыру аясында Қазақстан Республикасының еңбек сіңірген артисі А.Үлкенбаеваның күй-альбомын оқытушы Қ.Андиров, «Домбыра мен фортепианоға арналған шығармалар» туралы ҚР Мәдениет қайраткері Т.Естаев баяндады. Авторлық топтың бірігуімен жарыққа шыққан «Музыка пәнін оқыту әдістемесі» оқулығы мен Б.Тұрмағамбетованың «Ән қайнары – кең Жылыой» оқу-әдістемелік құралы кәсіби мамандар мен студенттер үшін таптырмас көмекші құрал болып табылады. Шара барысында «Музыкалық білім» мамандығының 3-курс студенті Г.Қалдыбекова «Кербез қыз», «Халық әні» мамандығының 3-курс студенті А.Құмарғалиева «Көбеннің әнін» нақышына келтіре орындады. Қорытынды сөзді Гуманитарлық ғылымдар және өнер факультетінің деканы Сағынгерей Аймұратов алып, рухани мұрамен байытуға арналған кітапхана қорындағы оқу құралдарының ізденіс пен шығармашылық саласындағы тұлғалар үшін керемет мүмкіндік екендігін жасырмады. Өнер мен музыка саласына қатысты кітаптарды кез-келген уақытта ғылыми кітапханадан таба аласыздар.
ПІКІРЛЕР