Мерекелік концерт: «Күй анасы - Дина»
Қазақтың әйгілі күйші композиторы, Қазақстанның халық әртісі Дина Нұрпейісованың 160 жылдығына орай Гуманитарлық ғылымдар және өнер факультеті, Музыка және өнер кафедрасы әдеби сазды күй кешін ұйымдастырды.
Күй өнері – қазақ халқының ең құнды, бағалы мұраларының бірі. Қаны мен жанында күй ойнаған ұлтымыз тума таланттарға кенде емес. Сондай дарын иелерінің бірі – қазақ өнерінде өзінің өшпес ізін қалдырған күйші, композитор Дина Нұрпейісованың орны қазақ халқы үшін өте ерекше. Тағылымы мол кеш шымылдығы университет ансамблінің «Әсем Қоңыр» күйімен ашылды.
«Ұлы даланың – ұлы күйшісі» атты Д. Нұрпейісоваға арналған арнайы кітап көрмесіне библиографиялық шолу жасау құрметі кітапханашы Айнұр Темірбекқызына ұсынылды.
1940 жылы өткен Қазақстанның жиырма жылдық тойына арнап Дина «Тойбастар» күйін шығарды. Күйші бұл күйінде өз мемлекетінің өркендеп, экономикасы мен мәдениеті бар халқының шалқыған қуанышын суреттейді. Әдемі шараның келесі кезегі әсем күймен ұласты.
Дина – тек алып күйші-домбырашы емес, ол әрі көп құрметіне бөленген халық композиторы. Оның әсіресе Ұлы Отан соғысы кезінде шығарған күйлері тамаша, солист-домбырашылардың, Құрманғазы атындағы мемлекеттік оркестр репертуары төрінен орын алған күйлер. Динаның «Той бастары», «Жеңісі», «Әсем қоңыры», «Сегізінші марты», «Сауыншысы» мәңгі жасайтын музыкалық мұра болып табылады.
Университетіміздің 2-курс студенті Берік Елшатты «8-март» күйін әсерлі орындады. Экраннан Қазақстан Республикасының халық әртісі, домбырашы, күйші Айгүл Үлкенбаеваның орындауындағы Д. Нұрпейісованың «Бұлбұл» күйі көрсетілді.
Д.Нұрпейісова ғұмырының соңғы кезінде шығарған «Той бастар», «Домалатпай», «Науысқы» («Науаи»), «Әсемқоңыр», «Жігер» сынды аса айшықты шығармаларымен өнерсүйер қауымның жүрегінде қалды.
Кеш сәнін көркемдей түскен күмбір күй кафедра оқытушысы Қанат Андировтың орындауындағы «Науысқы» күйі болды.
Динаның «Он алтыншы жыл» шығармасы патша әмірін естігендегі азаматтардың ыза-кегін, мойымас қайсарлығын, халық күшін бейнелейтін, тұлпарлар тұяғының дүбірі естілетін рухты күй.
Ерекше зейін аудартқан «Он алтыншы жыл» күйін университетіміздің оркестрі ортаға салды.
Қазақтың күйші қызы Дина халық алдына соңғы рет 1952 жылы 91 жасында шықты. Ал 1955 жылдың 31 қаңтарында күйші Алматы қаласында дүниеден өтті. Бүгінде күйші атында музыкалық мектептер мен көшелер бар. Атырауда Д.Нұрпейісова атындағы облыстық қазақ халық аспаптар оркестрі жұмыс істейді.
Мазмұнды шара соңында Гуманитарлық ғылымдар және өнер факультетінің деканы Сағынгерей Болатқалиұлы мен қатысушы қонақтар кафедра ұжымына шынайы ризашылықтарын білдіріп, сәттілік пен шығармашылық жетістіктер тіледі.
Дина – қазақ халқының ұлы күйшісі. Оның ерен еңбегі, қазақ музыкасына қосқан сүбелі үлесі әрқашан халқының жадында. Ғұмырлы күйші қазақ музыкасымен, қазақтың күмбірі бөлек күйлерімен мәңгі жасай бермек.
ПІКІРЛЕР