Атырау университеті Халықаралық ғылыми жоба серіктестігінде
12 сәуір Ғылым қызметкерлерінің күні қарсаңында Х.Досмұхамедов атындағы Атырау университеті мен «Зейін-Атырау» ұйымының әлемнің инклюзивті білім беру саласындағы алдыңғы қатарлы ғалымдары мен мамандары қатысуымен жүзеге асатын халықаралық ғылыми жоба серіктестігіне қатысатынын қуана бөлісеміз.
Канаданың Саймон Фрейзер Университеті (Simon Fraser University) профессоры, доктор Роберт Уильямсонның (Dr. Robert Williamson) басшылығында дайындалған «Мүмкіндігі шектеулі балалардың білім беру тәжірибесін бағдарлайтын салыстырмалы халықаралық зерттеу» (A comparative international study navigating the educational experiences of children with dis/abilities) атты жобаның, сол елдің Әлеуметтік-гуманитарлық ғылымдар кеңесінің (SSHRC) қаулысымен 3 жылға гранттық қаржыландыруы мақұлданған.
Инклюзивті онлайн білім беру саласындағы жаңашыл зерттеу боп табылатын бұл халықаралық жобаны жүзеге асырушы топ құрамында Канада, АҚШ, Иордания және Қазақстанның ғалымдары мен тәжірибелі мамандармен қоса болашақ педагог-маман студенттер де бар.
Дайындық жұмыстары 2020 жылдың қыркүйек айынан басталған серіктестікті жоспарлау мен жобалау үрдісін талқылау мақсатында Саймон Фрейзер университеті мен Атырау университетінің жобаға қатысушылары арасында бірнеше онлайн кездесу өтті.
Атырау университеті басышылығы тарапынан барынша қолдау көрсетіліп, жобаға қатысушылардың келесі құрамы анықталды: ф.ғ.д. А.Ө. Мұхамбетжанова, п.ғ.к. Л.Е. Қойшығұлова, п.ғ.к. Ж.Н.Сабирова, п.ғ.к. Г.К.Шұғаева, ф.ғ.к. А.А.Султангубиева.
Аталмыш жобаның Қазақстандағы инклюзивті білім берудің дамуына болашақ инклюзия мамандарын дайындау әдістемесін дамыту және осы саладағы зерттеулерді халықаралық стандартта орындау арқылы орасан зор үлесін қосатынына сенімдіміз.
Жобаның жүзеге асырылуына септігін тигізіп, Атырау мен Ванкувер арасында алтын көпір орнатып отырған университетіміздің бұрынғы Бірінші проректоры, қазіргі таңда Канада Вэст Университетінің (University Canada West) профессоры және Педагогикалық шеберлік орталығының директоры, Саймон Фрейзер Университетінің Жаңашыл білім беру технологиялары саласында екінші PhD оқуын оқып жүрген Айгерім Сенбекқызы Шилібековаға алғысымызды білдіреміз!
ПІКІРЛЕР