- Басты бет
- МЕДИА-РЕСУРСТАР
- БАҚ біз туралы
- Атырауда аспан асты мұражайы ашылады
Атырауда аспан асты мұражайы ашылады
Мемлекет басшысы Нұрсұлтан Назарбаевтың «Болашаққа бағдар: рухани жаңғыру» мақаласындағы «Туған жер» бағдарламасы аясында «Қазақстанның қасиетті рухани құндылықтары» немесе «Қазақстанның киелі жерлерінің географиясы» жобасы бойынша атқарылатын жұмыстар, еліміздің барлық өңірінде көне тарихи орындарды тауып, зерттеп, оны келешекке аманаттауға орасан септігін тигізетін болады.
Бүгінде жер табытына құрсанған кейбір қалаларымыздың ізін тауып, олардың өмір сүрген дәуірі, сәулеті мен мәдениеті, экономикалық кескін-келбетін анықтау, кешегі тарихы бүгінгі таным-санамен бағамдау жолындағы жұмыстар Елбасы мақаласынан соң, тың ізденістерге түрен салды.
«Туған жер» бағдарламасы аясында жүзеге асуы мұрат болған жобаның атауына мән берсек, қасиетті рухани құндылықтарды сақтай отырып, қосымша нақты киелі жерлердің картасын жасауымыз керек дегенді білдіреді. Ол үшін республикамыздағы әр облыс өз өңірінің тарихын бүтіндеп, жаңадан ғылыми-зерттеулер жүргізіп,
Елбасының тапсырмасын жүзеге асыруы қажет.
Елбасы мақаласынан туындаған маңызды міндеттерді атқаруда жергілікті атқарушы биліктің қолдауымен Атырау облысы тарихи-өлкетану музейінің мамандары тындырымды еңбек етуде.
Айталық, Атырау облысы тарихи-өлкетану музейінің мамандарымен биылғы жылы Қызылқоға ауданындағы «Миялы – 3» қорғандарына қазба жұмыстары жүргізіліп, нәтижесінде, сармат тайпасы дәуірінің тарихи кезеңдерінен сыр шертетін жәдігерлер табылды.
Шілде айынан бастап, Атырау қаласынан 6 шақырым, қала іргесіндегі Томарлы селосынан 2 шақырым және «Жұлдыз – 3» ықшамауданына бірнеше жүз метр қашықтықта орналасқан ортағасырлық «Ақтөбе – Лаэти» қаласына қазба жұмыстарын бастады.
Жуырда көне қала орнына облыс әкімінің орынбасары Әлібек Нәутиев барып, жасалып жатқан жұмыстармен танысты.
Оның айтуынша, археологиялық жұмыстар «Болашаққа бағдар: рухани жаңғыру» бағдарламасын жүзеге асыру аясында жүргізілуде.
– Көне қала «Ақтөбе – Лаэти» облыс орталығына жақын маңнан табылды. Бұл тарихты жаңаша зерделеуге жол ашып, тарихымыздың парақтарын толықтыруға негіз болатын жағдай. Мемлекет басшысы мақаласында киелі жерлердің Қазақстан халқы үшін маңыздылығын, онымен танысу өскелең ұрпақтың бабалар жүрген жолды білуіне мүмкіндік беретінін айтқан еді. Атырауда табылған және енді іздену арқылы мәлім болып жатқан көне қалалар орны Қызылқоға, Жылыой, Махамбет және басқа аудандар территориясында көп. Мақсатымыз – осылардың барлығына қазба жұмыстарын жүргізу, оларды қорғауға алу жөнінде Мәдениет және спорт министрлігіне ұсыныстар беру. Өздеріңізге аян, бүгіндері Атырау аймағында Алтын Орда астанасының бірегейі болған Сарайшық қаласын сақтап қалу және қазба жұмыстарына Мәдениет және спорт министрлігі тапсырма беріп, жұмыстар атқарылуда. «Ақтөбе – Лаэти» қаласын қорғауға алу үшін құжаттар жасақтау және оны қоршауға алып, қорғау мәселелерімен айналысатын боламыз. Бұл ұлттың тарихы.Оны келешек ұрпаққа жеткізіп аманаттау сіз бен біздің парызымыз, – деді облыс әкімінің орынбасары Әлібек Нәутиев.
Көне қаланың тарихы сыр шертеді
Әлқисса, Ұлы Жібек жолының бойында сауда керуендеріне арналған «Ақтөбе – Лаэти» қаласы жөнінде 1960 жылы ғалымдар алғашқы болжамдар мен ақиқаттарды айта бастады. Мұнда атыраулық өлкетанушы В.Афанасьевтің көрсетуімен 1965 жылы Қазақстан Ғылым Академиясы Ш.Уәлиханов атындағы тарих-археология және этнография институының ғылыми қызметкері М.Мерщиев алғашқы болып археологиялық барлау жұмыстарын жүргізді. Нәтижесінде, Ақтөбе – Лаэти қаласының екі қорған ескерткіштен тұратындығы анықталды.
Атырау облыстық тарихи-өлкетану музейінен алған мәліметке сүйенсек, М.Мерщиевтің пікірінше: «Бірінші ескерткіш – оңтүстік бөлігі негізінен, өзара кескін үйлесімі жөнсіз, оңтүстіктен солтүстікке қарай сайды бойлай, ұзындығы жетпіс бес метрге дейін, ені отыз бес метр, биіктігі бір жарым метрге дейінгі үш төбеден тұрады. Олар бір-біріне таяу орналасқан немесе тура қабысқан архитектуралық кешен қалдықтарының көрінісі сияқты. Негізгі массивтің солтүстік-батыс жағында 5-6 метр жерде неғұрлым кіші құрылыстардың қалдықтары болып көрінетін жекелеген екі шағын төбе орналасқан. Одан әрі оңтүстікке қарай сайды бойлай созылған шамалы байқалатын саяз төбе, тағы да неғұрлым кіші құрылыстардың қалдықтары болуы мүмкін», – дейді.
Ақтөбе қаласының жүйелі түрдегі қазба жұмыстары
Л.Галкин жетекшілігімен КСРО ҒА археологиялық институтының Еділ – Орал экспедициясы 1974 жылдан басталды. Қазба жұмыстары үздіксіз, кейде араға бір жыл салып жүргізіліп отырған. Оның нәтижелерін
Л.Галкин ҚазКСР ҒА тарих-археология және этнография институтына ғылыми есеп түрінде берді. Ол қазба орнының 200х80 метр бөлігін белгілеп, қазды. Ақтөбе жөніндегі зерттеу мақалаларында, еңбектерінде қаланың Ақтөбе атына «Лаэти» атауы қосыла айтылады. Археолог Л.Галкин, Ақтөбе қаласын итальяндық жиһангерлер, ағайынды Пициганилердің картасындағы Лаэти қаласымен байланыстырады. Қаланың қос атауы осылай пайда болған. Л.Галкин өзінің Лаэти атауы туралыжазбасында: «Лаэти. Мүмкін италяндық саяхатшыға осылай естілген шығар. Түрік сөздерінен бұл сөзге сәйкес, келетіні «лайлы» сөзі». Бұл, мүмкін, мекеннің қасынан ағатын Жайық сағасының су тасқыны кезінде судың лайлануымен және жаз аяғында судың аз мөлшерінде тағы да лайлануымен байланысты болса керек, – деп тұжырым жасаған.
Жалпы, бұл екі ғалым да көне қаланың тұрғындары қоныстанған жеріне барлау жасап, зерттеу жұмыстарын жүргізген.
Сол зерттеулердің нәтижелері көрсеткендей, қалада түрлі металл өңдейтін орындар, әйнек, зергерлік бұйымдар жасайтын шеберханалар болған. Қаланың көлемі 200×80 м, бірегей мәдени қабаты сақталған. Қазба жұмыстары көрсеткендей, бұл жерде қолөнершілер қалашығы болған.
Үйлер шикі саман кірпіштен қаланған, үйлердің көлемі шамамен 4×5 м, екі-үш немесе төрт бөлмеден тұрады. Бөлменің қабырғасын жағалай айналдыра, ені 1,5-2 м-дей болып келетін суфа салынған. Бөлмелер көбіне тандыр пешпен жылытылатын болған. Пештің жылуы суфалардың ішіне жүргізілген жылыту жүйесі кандар арқылы өтіп, бұрышқа салынған тік мұржа арқылы сыртқа шығып кететін болған. Барлық қабырғалар мен суфалар саз балшықпен сыланып, әктеліп отырған. Бөлмелердің едені нығыздалып, сазбен сыланған. Тұрғын бөлмелерде еденінен қазылған тары мен арпа сақтайтын қоймалар кездеседі.
Ғимараттың сыртын әртүрлі ою-өрнекті, түрлі-түске боялған қаптама плиталармен безендірген. Көбіне көгілдір ақық түсті болып келеді. Сондай-ақ қыш кірпіште құрылыста қолданылған материал болып табылады. Оларды үй қабырғасын, іргетасын тұрғызуға, еденге төсеуге, өзге де мақсаттарда қолданған. Ғалымдар мұндай құрылыс материалының IХ-Х ғасырлардан бастап қолданылғанын айтады. Атақты архитектор Т.Басенов бұл кiрпiштiң бiр шаршы сантиметрiнің 64,5 кг қысымға шыдайтын мықтылығын айта отырып, жергiлiктi саздан бұдан артық құрылыс материалын әзiрлеу мүмкiн емес деген пайымдауын айтады.
Қыш бұйымдардан қызыл түсті балшықтан жасалған бұйымдар басым болып келеді, олар темір тотығы, майда қоспалар: пирит, слюда, әкпен ерекшеленетін темірленген балшықтан жасалған. Ас ішуге арналған ыдыстардың бір бөлігі әртүрлі өрнектермен безендірілген түрлі-түсті жылтыр сырлы ыдыстар. Бұйымдардың сырлануы әртекті. Кварц, далалық шпат, каолин т.б. сілтілік материалдар 950º С температурадан жоғары ыстықта шыныға ұқсас қабат қалыптастырып, глазурьленеді. Мөлдір қарасұр сырлардың құрамында дала шпатының көп екендігі белгілі. Күңгірттеу сырлардағы глазурь құрамында қалайы тотығы бар. Қоңыр түске мыс тотығын қосу арқылы қол жеткізген. Қызыл балшықты сырлы ыдыстар 900-1200º С температураға дейінгі қышқылды ортада күйдірілген. Екінші бір түрі – кашин балшығынан көркемделіп жасалған пиала, тостаған, құмыра және вазалар. Олар силикат текті ашық ақ түсті кремнезимді балшықтан дайындалады. Сыртына көпбояулы полихромды суреттер үстінен жылтыр сыр жағылып жасалған. Әдетте үш түстен тұрады: кашин балшығының өзіндік ақ түсінен, өрнектері көк немесе жасыл түспен салынады. Жасыл түс алу үшін мыс тотығы қолданылса, қаракөк түстен көгілдір түске дейін кобальт қолданылған. Мұндай ыдыстар «хорезмдік стиль» деп те аталады. Кобальтпен әшекейлеу күрделі өсімдікті өрнек түзеді, бұл түр Тимуридтер дәуірінде пайда болып, XIV ғасырдың соңынан бастап, XV ғасырдың аяғына дейін гүлденген.
Ескерткіштен табылған шығыр құралдары және диірмен тастарына қарағанда, бақша шаруашылығы кеңінен дамыған. Сондай-ақ мал да көп болған, оны остеологиялық материалдардың, яғни, мал сүйектерінің молдығы дәлелдейді. Осы жердің тұрғындары аңшылықпен және балық аулаумен айналысқан. Қорыта айтқанда, бұл жерде барлық дерлік қажетті заттармен қамтамасыз етіп отырған тұтас бір экономикалық кешен болған, одан артылғандары сауда-саттыққа жіберілген.
Археологиялық зерттеулердің нәтижелері мұнда түрлі елдердің ақшалары, соның ішінде, Хұлағидтық елхан Махмұд Ғазанның алтын тиыны және басқа да күміс, мыс тиын түрлері болғандығын көрсетті. Иранды билеген Махмұд Ғазан мен Жошы Ұлысын билеген Тоқтының кезінде белгілі бір келісім бойынша іс-шаралар жүргізілген секілді. Сондықтан Ақтөбе – Лаэтиден иран тиындары табылуы таңғаларлық құбылыс емес. Алтын тиынның бетіне Калима шахадат – куәлік сөзі жазылған, яғни, «Алладан басқа Құдай жоқ, Мұхаммед Алланың елшісі» деп жазылыпты. Тиын Иранның оңтүстігіндегі Шираз қаласында соғылған.
Қаланың құлдырауына екі түрлі себеп болуы мүмкін: Әмір Темірдің жорығы немесе Каспий теңізі деңгейінің көтерілуі деп жорамал жасалынған.
Қаланың негізгі кәсібі іргелес Алтын Орда қалаларын қолөнер заттарымен қамтамасыз ету және Хорезм, Иран сынды елдерге сапар шеккен сауда керуендеріне қызмет ету болған.
Археологтар көне қаланың өндіріс орнын тапты
Қазіргі таңда жүріп жатқан қазба жұмыстары бұл ғалымдар белгілеген қалашықтың бөлігіне қатысты емес. Бұл қазылып жатырған 20х20 метр жер бөлігіне алдымен, музей мамандары барлау жұмысын жүргізіп, топырағын тазалап, құрылыстың кірпіші қаланған қабырғаларының орнын анықтады. Осы қабырғалардың негізінде, қазба орнында бөлмелер пайда болды. Кейбір бөлмелерден, қыш ыдыстардың сынығы, металл қорытпаларының қалдығы, моншақтар және жазуы сақталмаған мыс тиындар табылды. Металл өнімдерінің қалдықтары, әсіресе, арнайы ошақтардың ішінен шықты. Бұл ошақтардың кейбіреуі кірпішпен қаланса, кейбіреуінің арнайы мұражасы жасалынған. Демек, бұл қазылған орындағы ошақтар қалашықтың жанында тұрмыстық шеберхананың болғандығын растайды. Қазба орнындағы жер қабаттарына қарап отырып, теңіз астында қалған қалашықтың аз сақталған қабырғаларының бөлігін көруге болады.
Музей қорында аталған қазба орнының 500-ге жуық жәдігері сақталған. Оның ішінде алтын монетаның, жоғары сапалы алтыннан, қыштан жасалған сәндік әшекей бұйымдары мен жебе ұштары, құмыралар табылды.
Атырау облыстық тарихи-өлкетану мұражайының директоры Рашида Харипованың айтуынша, бастапқыда қаланың орнынан түсеміз деп ойлағанымен де, археологтар өндіріс орнына тап болған. Оған сол жерде табылған жәдігерлер арқылы көз жетіп отыр. Қалып жүзік, моншақтар соғуға арналған немесе үйдің сыртын әрлеуге арналған қалыптардың табылуы болжамды нақтылап тұр. Ендігі мәселе – көне қала орынының сызбасын жасап, қалашықты қайта қалпына келтіріп, аспан асты музей қорығын жасау. Бұл – ішкі туризмді дамытуға негіз болады.
Сайып келгенде, бұл пікірді көне қаланы қазу жұмысын жүргізген археолог М.Қалменов те қолдап отыр.
– Менің пайымдауымша, бұл жерде қазір 0,0001 пайызы ғана ашылған сияқты. Мына енді нақты айту қиын, меніңше, әлі ұзақ жылдық жұмыс бар. Жеке өзімнің барлау жұмыстарым бойынша, орташа 10 га жерде осы қаланың қалдықтары орналасып жатыр. Бізге әзірге бұйыртқаны – өндіріс орны. Көне қаланың облыс орталығына таяу болғаны туризмнің дамуына жол ашады. Бұл жер – тарихшы, археолог боламын деген арманы бар жастар үшін таптырмас тәжірибе алаңы. Осы қазба жұмыстарына Х.Досмұхамедов атындағы Атырау мемлекеттік университеті студенттері мен «Жасыл ел» жасағы құрамындағы отызға жуық жастар қатысты. Жалпы, көне қалалар бойынша ғылыми зерттеулерге ден қоюды талап ететін жаңа кезең келгендей, – дейді Мұрат Қалменов.
Ақтөбе – Лаэти қалашығына қазба жұмыстары аяқталған соң, музей мамандары Сарайшық қаласына ұйымдастырылатын қазба жұмыстарына қатысуды жоспарлап отыр. Өйткені бұл археологиялық экспедиция келешекте Елбасының тапсырмасына сәйкес, рухани құндылықтардың маңыздылығын арттыру, өлкетануға қатысты жүйелі зерттеулерді жүргізу, облыстың көне тарихына қазба жұмыстары арқылы нақты тұжырымдар жасай білу үшін музей мамандарына зор тәжірибе алмасу болады.
Келешекте Атырауда аспан асты музейлері жобасын жүзеге асыруға мол мүмкіндік болады деп күтілуде.
Айтарлығы, биыл Атырау облысында «Болашаққа бағдар: рухани жаңғыру» бағдарламасын жүзеге асыру мақсатында үйлестіру орталығы ашылды. Жобалық кеңсе бағдарламаның «Туған жер», «Киелі жерлер географиясы», «100 жаңа есім» бағыттарын іске асырады. Орталық құрамына мемлекеттік органдар, мәдениет пен білім салаларының өкілдері кірген.
Сайып келгенде, тарихты зерделеп, оны ұрпаққа аманаттауға арналған Елбасы Н.Назарбаевтың «Болашаққа бағдар: рухани жаңғыру» мақаласындағы «Туған жер» бағдарламасы аясында «Қазақстанның қасиетті рухани құндылықтары» немесе «Қазақстанның киелі жерлерінің географиясы» жобасы бойынша атқарылар жұмыстардан халық зор үміт күтуде. Үміт ақталғай!
Ұқсас материалдар
МИНИСТР САЯСАТ НҰРБЕК АТЫРАУДАҒЫ ЖЕДЕЛ ШТАБТА ҒАЛЫМДАРМЕН КЕЗДЕСТІ
Жариялаған : ҚР Ғылым және жоғары білім министрлігі (инстаграм)
Толығырақ бейнематериалда : https://www.instagram.com/reel/C5u7v69Lgh8/?igsh=MTR5N3lmNGhqaDlkMw==
Ғылым және жоғары білім министрі Саясат Нұрбек төтенше жағдай жедел штабта өңір ғалымдарымен кездесті
Жариялаған : Sayasat Nurbek TikTok
Толығырақ бейнематериалда : https://vm.tiktok.com/ZMMQsNHQS/
Ғылым және жоғары білім министрі Саясат Нұрбек төтенше жағдай жедел штабта өңір ғалымдарымен кездесті
Жариялаған : Sayasat Nurbek фейсбук
Толығырақ бейнематериалда : https://www.facebook.com/share/v/YEhX5nqhniGepAPQ/?mibextid=WC7FNe
Ғылым және жоғары білім министрі Саясат Нұрбек төтенше жағдай жедел штабта өңір ғалымдарымен кездесті
Жариялаған : Sayasat Nurbek в инстаграм
Толығырақ бейнематериалда : https://www.instagram.com/reel/C5u3519iZrr/?igsh=NmhsN2k1ajJiZHRn
Атыраулық студенттер бөгет салып жатыр
Жариялаған : Zhanibek GALYM/ Жәнібек Ғалым TikTok
Толығырақ бейнематериалда : https://vm.tiktok.com/ZMMQBS43S/
ПІКІРЛЕР