23 сәуірде Инновациялық білім беру факультетінде, Педагогика кафедра-лабораториясының Парасаттылық мектебі аясында - Саяси қуғын-сүргін қозғалысына 100 жыл толуына орай Алаш қозғалысының қайраткері, дәрігер, ғалым-ұстаз Халел Досмұхамедұлының 24-ші сәуір туған күніне арналып «Хакім Халел-ғибратты ғұмыр» тақырыбында ашық сыр-сұхбат өткізілді.
Сыр-сұхбаттың мақсаты: Халқымыздың келешегі үшін еңбек сіңірген, ХХ ғасырдың басында қазақ қоғамындағы саяси өмірдің бел ортасында қайраткерлік ісімен көрінген, ұлтының ұраны болған, сезімтал лингвист, фольклорист, тарихшы- этнограф және аудармашылық қарымды қабілетімен қысқа ғұмырында көп тіл білетін полиглоттық қасиетті дархан дарынымен, еңбекқорлығын танытқан Халел Досмұхамедұлының бойындағы мыңды жығар білімділік, біліктілік, зиялылық, тұлғалық тамаша қасиеттерін студенттерге ұғындырып, бойларына сіңіру.
Сұхбатымыздың басты қонағы болған Қазақстан Жазушылар Одағының мүшесі, Қазақстанның құрметті журналисі, Қызылқоға ауданының құрметті азаматы, өлкетанушы, университетіміздің ардагер-ұстазы Төлеген Жаңабайұлы тарихтан шежірелі сыр шерткен, өзінің «Хакім Халел» кітабының қалай жазылып басталғаны туралы жан-жақты баяндай келіп, біз білмейтін кейбір жайттармен таныстыра отырды. Қазақстан Журналистер Одағының мүшесі, доцент, университетіміздің білікті ұстазы Сабиров Айдар Рамазанұлы шебер сөз саптауымен сұхбатты тартымды жүргізді. Түрлі сауалдарға толыққанды, толымды жауап алған студенттер мен магистранттар осы кездесу үшін сұхбат қонағы мен жүргізушісіне тебіреніске толы ыстық ықыластарын алғыс айтумен жеткізді.
ПІКІРЛЕР