«ЖОО-да рухани орта қалыптастыру және ұлттық құндылықтарды жаңғырту»
25 ақпанда "Көптілді білім беру" факультетінде "Көптілді дайындық және Қазақ тілі мен әдебиеті" кафедрасының ұйымдастыруымен «ЖОО-да рухани орта қалыптастыру және ұлттық құндылықтарды жаңғырту» тақырыбында онлайн семинар өтті.
Мақсаты - студенттердің ұлттық құндылықтар туралы білімдерін кеңейтіп, Елбасының «Рухани жаңғыру» мақаласының мазмұнын кеңінен талдау. Семинардың модераторы ф.ғ.к.,профессор Жұмазия Мәжитқызы: "«Рухани жаңғыру» бағдарламасы - болашаққа жасалған ұлттық құжат. Жаңғыру білім мен біліктілікті арттырумен, ұлттық құндылықтарды дәріптеумен өлшенеді" деді.
Ардагер ұстаз, тарихшы, аға оқытушы Серікқали Тұрсынғалиұлы «Рухани жаңғыру» мақаласын тарихи тұрғыдан талдаса, филология ғылымдарының кандидаты Гүлзира Борамбайқызы: «Рухани жаңғырудың негізгі құралы – кітап» екендігін айқындап, тыңдаушылар мен студенттерге «Әр қазақ оқуы тиіс 30 кітап» жобасын ұсынды.
П.ғ. магистрі, оқытушы Жадыра Қадырбекқызы «Сананың ашықтығы» идеясының өзектілігін талдап, өз ұсыныстарымен бөлісті. Профессор-оқытушылар баяндамасын студенттер мен шетелдік тыңдаушылар жалғастырды. Шетелдік тыңдаушы қатарынан Абдрахманов Құрманғазы: «Өзбекстан қазақтарының салт-дәстүрі мен құндылықтары» тақырыбында сөз қозғап, Өзбекстан мен Қазақстандағы рухани бағдарламалардың ұқсастығы мен айырмашылығын сөз етті.
Баяндамасын қорыта келе, шетелдік тыңдаушы: «Біз Өзбекстанда жүрсек те, Иранда, Қытайда болсақ та, түбіміз түркі, ұлтымыз қазақ екенін мақтан етеміз»- деді. Студенттер мен шетелдік тыңдаушылар осындай тағылымы мол, ұлттық сананы жаңғыртуға арналған іс-шаралардың тұрақты жүргізілуін жөн санайтындығын жеткізді.
ПІКІРЛЕР