16.03.2023 78

Гуманитарлық ғылымдар және өнер факультеті, журналистика кафедрасының ұйымдастыруымен Қазақстан Жазушылар одағының мүшесі, «Қазақстан Журналистер одағы» сыйлығының лауреаты, «Қазақстанның Құрметті журналисі», «Ақпарат саласының үздігі», Қызылқоға ауданының құрметті азаматы, өлкетанушы Төлеген Жаңабайұлымен «Публицистің шығармашылық шеберлігі» пәні бойынша 2 курс студенттеріне қонақ дәріс өткізілді.
Журналистік пен жазушылық тізгінді қатар алып келе жатқан майталман жазушы студенттерге еңбек жолынан қызықты естеліктерін айтып, тәжірибелерімен бөлісті. Бүгінгі дәуір мен кешегі кезеңді салыстыра келіп, жастарды ізденімпаздыққа, ұлтжандылыққа шақырды. Оның әсіресе, табиғатты сүйіп, қорғау туралы пікірлері үлкен ойларға жетеледі. Қазақ әдебиетінде публицистика жанрының қанат жаюына өзіндік үлесін қосып келе жатқан қаламгер әр кітабына тарихи дерек пен құнды мәліметтерді ұтымды топтастыра білетін зерттеушілік қызметі жайлы да сыр шертті.
Дәріс соңында қарымды қаламгер, ұлағатты ұстаз жас журналистерге ақыл-кеңесін айтып, студенттердің көкейлеріндегі өзекті сұрақтарға жауап берді. Естелік суретке түсіп, кітаптарын жастарға қолтаңбасымен тарту етті. Төлеген Жаңабайұлының ерлік пен еңбекті насихаттаған, туған жерді құрметтеу, табиғатты қастерлеу сынды адами құндылықтарды арқау еткен шығармалары жастарға әлі талай үлгі-өнеге, тәлім-тәрбие берері анық.

Тізімге қайта оралу