Əкеден қалған аманат
Қасиетті Ораза айының алғашқы күні Исатай халқы үшін үлкен мереке болды. Нарының ыстық құмынан күш -қуатын сезінген, теңіздің тереңінен тұңғиыққа бойлаған, ана мен бауырдың ыстық махаббатынан нəр алып, ерте кеткен əкенің аманатын арқалаған жас, балауыз ақын тұңғыш төл туындысын жарыққа шығарды. Ерте жастан -ақ ақындық жолға түсіп, талай додаларда оза шапқан, қара сөздің қадір-қасиетін сезініп поэзия əлемінде қанат қаға білген Зинеденов Еркебұлан Уəлитханұлы 1998 жылы Атырау облысы Исатай ауданы Зинеден селосында дүниеге келген. Ю. Гагарин мектебінен түлеп ұшқан ақын бүгінде қасиетті білім ордасы Х.Досмұхамедов атындағы Атырау мемлекеттік университеті журналистика мамандығының 3 курс студенті. Адам бойындағы адамгершілік, кісілік, кішілік, адалдық секілді ең асыл қасиеттерді бойына жинай білгенін Еркебұланның əсел, рухты поэзиясынан-ақ байқауға болады. Ал кітаптың " Əкеден қалған аманат" аталуының өзі үлкен жауапкершілікті көрсетеді.
Тұсаукесер рәсімі Исатай аудандық "Жалын" мəдениет үйінде өтті. Кеш тізгінін ұстаған журналист Нұржан Өнербай əдемі, ұйқасты сөздерімен кештің əрін кіргізіп, сүбелі сұхбат та жүргізді. 500 тиражбен шыққан кітаптың лентасын қию мәртебесі аудан əкімі Марат Мурзиев пен ақын, жазушы Жəкен Омаровқа бұйырды. Жинақтың шығуына демеушілік көрсеткен Абат Губайдуллин, кештің жоғары деңгейде өтуіне себепкер Бауыржан Құрасов болды. Автор ұйымдастырушылар Мұхамеджанов Сəдуақас пен Ринат Алиев мырзалардың еңбегін ерекше атап өз алғысын білдірді. Кеш барысында Еркебұланның анасына, мектеп кезіндегі ұстаздарына, поэзияда өзіндік дара жолдары бар ел ағаларына, аудан əкіміне жəне университет ұстаздарына сөз беріліп, жақсы тілектер мен ниеттерін білдірді. Гагарин орта мектебінің оқушылары Еркебұланның өлеңдерін жатқа оқып, халықтың ықыласына бөленсе, Еркебұланның курстасы, жас ақын Құрманбаев Жеткеншек те жүректен шыққан толқыныс жырын оқып елді сүйсіндірді. Өз туған жерінің құмын, тасын,теңізін, самалын,елін, бауырын жырға қосқан ақын кітабының тұсаукесер кеші өте жоғары деңгейде өтті. Оған дәлел мəдениет үйінде ине шаншыр орынның болмауы. Рухани кештің соңы мейрамханада жайылған ауызашар дастарханымен жалғасты. Халқына шығармалығын арнап, аманатқа адалдығын аңғартып, сауабы мол қасиетті айда Зинедендер əулетінің атынан ауызашар беріп, елдің ақ батасын алған Еркебұлан ақынның əлі шығар шыңы биік болмақ.
Мырзабек Аяулым, 3курс журналистика
ПІКІРЛЕР